DILI, STLTIMORLESTE.com – Ministeriu Interior (MI) liu husi Polisia Nasional Timor Leste (PNTL) halo ona prosesu investigasaun ba suspeitu nain 3 ba jogu Grand Dragon Lotaria.
“Horiseik, Kuarta (03/12/2025) ita halo intervensaun ba Jogu Grand Dragon Lotaria ninian, ohin kontinua halo apreensaun ba objetu balun neebe liga ba sira nia atividade, ita sei aprezenta ba iha Ministeriu Públiku (MP) aban Sesta (05/12/2025) loraik, depois kompetensia Ministeriu Públiku (MP) nian prosesu ba Tribunal,” hatean Portavós PNTL Superientendente Asistente Polísia João Belo dos Reis ba jornalista sira iha sala Konferensia Ministeriu Interior (MI) Vila Verde, Kinta (04/12/2025).
Portavós PNTL nee esplika, hanesan ema hotu hatene depois rezolusaun governu hasai jogu online tenke taka. Neebe karik kompanhia sira neebe afetadu ba operasaun ida ne’e sira iha direitu koalia iha Tribunál.
“Suspeitu ita tau iha situasaun operasaun horiseik, Kuarta (03/12/2025) ita deskobre suspeitu nain 3 no sira neebe mak servisu iha jogu Grand Dragon Lotaria hamutuk nain 15, ita foti sira nia deklarasaun”, nia informa.
Autoridade seguransa nee koalia, kona-ba atividade Jogu Grand Dragon Lotaria nee legal ka ilegal nee sira bele aprezenta iha Tribunál, polísia halao tuir saida mak iha.
“Orientasaun neebe mak mai husi Ministeriu Públiku (MP) ba jogu sira hotu neebe mak konsidera aplika jogu online iha autorizasaun operasaun ba sira”, nia deklara.
Portavós PNTL João Belo dos Reis hateten, leí organika PNTL fo nafatin dalan ba polísia atu halo intervensaun ba kazu transnasional, kazu krimi organizadu, krimi online sira neebe konsidera hanesan Cyber Crime neebe iha, sira aprezenta nafatin ba iha MP mak iha kompetensia atu delega ba se.
“Rezolusaun governu termina ona, kualker jogu neebe liga ba online via públiku konsidera ilegál. Neebe operasaun sei kontinua, kualker jogu neebe konsidera online tuir ita nia rezolusaun governu fo sai tiha ona,” nia deklara.
Iha fatin ketak, Primeiru Ministru (PM) Kay Rala Xanana Gusmão orienta autoridade sira taka Jogu Online Gran Dragon Lotaria tanba kontra rezoluzaun governu, tanba tuir rezolusaun governu 54/2025 – 01/10/2025 kansela ona lisensa jogu online iha Timor Leste, neebe molok nee bandu ona atu loke jogu online iha territoriu laran.
Xanana koalia, nia orienta taka jogu online Gran Dragon Lotaria nee tanba la obedese ba rezolusaun governu númeru 54/2025 iha loron 1 Outobru 2025.
Jornalista: Jeniche da Costa
Editor: Xisto Mendonça
