DILI, STLTIMORLESTE.com – Polisia Nasional Timor Leste (PNTL) hamutuk ho profesores no autoridade lokal atu garantia seguransa ba estudantes husi Eskola Sekundáriu Jeral FINANTIL no estudantes husi Eskola Sekundáriu Jeral 10 Dezembru Komoro.
Komandante Esquadra Dom Aleixo Interinu, Inspetor Xefe Domingos Pinto dehan, PNTL liu husi eskuadra Dom Aleixo sempre halo kedas atuasaun ou hola medida ida neebe dala ruma tenke, mezmu ninia konsikuensia nee PNTL asumi, maibe ida nee mak PNTL deklara hanesan komandante eskuadra, maibe tanba asaun neebe sira halo uza hela farda, tanba nee prejudika oituan, maibe laos estudantes hotu-hotu.
“Ami PNTL la konsiente aan katak, fatin PNTL laos fatin mai buka osan, maibe fatin ida PNTL nee hanesan mai para atu servi, tanba nee PNTL sei hamutuk ho profesores no autoridade lokal sira atu bele garantia seguransa iha eskola rua nee, la signifika estudantes husi eskola rua nee hotu-hotu involve iha krimi,” dehan Komandante Eskuadra Dom Aleixo Interinu, Inspetor Xefe Domingos Pinto ba jornalista sira iha ESJ FINANTIL Aimutin, Kinta nee (03/07/2025).
Nia dehan, liu husi atividades dialogu ida nee husu estudantes sira atu komunga, jerasaun kontinuador mak estudantes sira, bainhira se mak foti liman, foti fatuk hodi hakanek ema seluk nia sei halo traisaun ba lutador sira neebe fo ona sira nian vida tomak ba rai ida nee.
“Hanesan PNTL Komandante Eskuadra Interinu husu ba estudantes sira tau nafatin liafuan neebe PM Interinu hatoo ona, tanba inan aman sira esperansa ba ita boot sira katak, fo tempu neebe diak halo aprendizajen,” nia afirma.
Iha fatin hanesan, Revania Rangel hanesan estudantes dehan, ohin koalia kona-ba konstrusaun ba paz, maibe sira mos hakarak atu hetan paz iha sira nian Eskola 10 Dezembru ho Eskola FINANTIL, maibe dala barak oras too sai husi eskola nunka hetan paz iha dalan, maibe sempre hasoru deit fatuk iha dalan.
“Ami sempre hasoru fatuk iha dalan no ami lao mos la seguru bainhira ami sai husi eskola, tanba nee ami husu ba PM Interinu oinsa atu haree rezolve problema ida nee, tanba ami sai vitima ba estudantes neebe iha hanoin negativu. Hau nian sujestaun mak ida nee, se bele dialogu ida nee labele iha eskola ida nee deit, maibe halo dialogu ho estudantes neebe iha hanoin negativu sira nee, liu-liu estudantes FINANTIL no 10 Dezembru nian,” nia esplika.
(jac)
