DILI, STLTIMORLESTE.com – Komando Polisia Nasional Timor Leste (PNTL) hasai ona diretiva ba Komando Munisipiu nomos unidade sira atu halo patrulhamentu iha loron boot natal no tinan foun.
Liafuan nee hatoo husi Komandante Jeral PNTL Komisariu Polísia, Henrique da Costa ba jornalista iha Palasiu Prezidensial Nicolau Lobato, Bairo Pite, Segunda (22/12/2025).
Nia hatete, komanda jeral hasai ona diretiva ba iha Komando Munisipiu unidade sira, atu nunee halo atividade patrolamentu hodi prevene ba iha krime nomos problema neebe mosu.
“Los duni iha loron hirak nee mosu duni tuda malu, mais ita nafatin marka prezensa para nunee labele akontese. Ita hatene katak buat neebe akontese nee ita nia parte unidade espesial, patrola komando sira responde kedas no asegura situasaun nee,” dehan nia.
Nia dehan, iha diretiva Konjunta nee serbisu hamutuk Polisia ho Forsa Defeza nian forma ona forsa tarefa konjunta 2 nee sei kompleta malu hodi halo movimentu prevensaun nian nomos atuasaun ka responde ba krime sira neebe karik mosu.
“Ita identifika problema barak mosu fator ida mai husi konsumu alkohol, kuandu hemu tua barak liu bele perturva mos ema seluk nia movimentu no kria mos problema iha neeba,” tenik nia.
Iha biban nee Komandante mos hatoo mensajen ba joven sira nomos ba ema hotu katak, seguransa nee ema hotu hotu nia laos polisia mesak mak responsabliza no Forsa Defeza mesak mak responsabliza, tanba nee husu hotu hotu nafatin hatudu maturidade diak iha sosiedade no serbisu hamutuk nafatin, tanba hatudu ona iha eventu sira ba kotuk iha vizita Sua Santidade Papa Francisco mai Timor Leste nomos vizita Sekretariu Jeral ONU nia ho atividade barak neebe mak apoiu husi ema hotu hotu nia no selebra atividade sira nee lao ho dia.
Tanba nee Komandante husu parte hotu hotu tama iha natal no tinan foun nian nafatin kopera malu, nunee labele hamosu problema.
Iha biban nee Komandante lori PNTL nia naran hatoo boas festa do santo natal no ano novu ba ema hotu hotu.
Jornalista: Emerenciana Pinto
Editora: Domingas Gomes
