BAUKAU, STLTIMORLESTE.com – Polisia Nasional Timor Leste (PNTL) Komando Munisipiu Baukau liu husi Eskuadra Kelikai, hein parte Florestal atu submete kazu insendiu iha foho area Matebian ba Ministeriu Publiku.
Informasaun nee hatoo husi Komadante Eskuadra Postu Kelikai, Inspetor Polisia Justinho do Carmo Fernandes ba STL liu husi telefone, Segunda (14/10/2024).
“Hau simu orientasaun husi Komandante Munisipiu halo identifikasaun, neebe ami sei hein parte florestal kuandu iha ona indisius ruma hatoo keixa mai foin halo prosesu,” nia dehan.
Komandante Eskuadra nee esplika, identifikasaun refere Polisia Eskuadra Kelikai ezekuta, tanba peregrinu sira lao kontra orariu viajen ba Kristu Liurai Foho Matebian neebe sein rekonhese husi parte igreja no Autoridade Suku no Postu.
Nunee bainhira insendiu refere akontese, parte seguransa liu husi Polisia Eskuadra identifika ema nain 40, maibe seidauk bele prosesu ba rejistu iha MP, tanba seidauk iha evidensia forte husi parte Florestal hasoru peregrinu sira.
Hatan ba kestaun nee, Xefe Departementu Florestal Delegasaun Territorial Munisipiu Baukau, Antonio Jose Lopes hateten, diresaun florestal liu husi membru destakadu hamutuk ho autoridade militar no sivil iha Postu Kelikai kontinua halo hela identifikasaun, insendiu refere rezultadu husi asaun ema deskonhesidu.
“Nee kontra lei sira neebe hakerek katak labele sunu rai arbiru, agora sunu tiha hanesan nee estraga ai-horis barak. Ita ba kaer ema arbiru atu responde ba ida nee mos presiza tempu naruk,” hateten Antonio
Nia sublina, parte Florestal sei esforu hodi kompleta dadus, tanba dadaun servisu hamutuk ho parte seguransa.
(EST 2)
