DILI, STLTIMORLESTE.com – Polisia Nasional Timor-Leste (PNTL) husu populasaun iha teritoriu laran, atu kontribui pas no estabildiade durante selebrasaun festa Natal to’o simu tinan foun 2026.
Komandante Jeral PNTL, Komisariu Jeral Polisia Henrique da Costa hatete, iha epoka Natal ida-nee, marka ho fiar, fraternidade, no esperansa atu espíritu Natal nian hafoun iha ema ida-idak ho valor dame nian, solidariedade, respeitu, no domin ba malu.
Tan nee nia husu ba populasaun sira atu kontribui ba pas, nunee ema hotu-hotu bele selebra natal ho tinan foun ho hakmatek no iha pas nia laran.
“Durante periodu festeza ida-nee, hau apela atu mantein pas, orden publika, no konvivénsia armonioza entre ita, hodi respeita lei no valór sira neebe halibur ita nuudar nasaun. Mai ita selebra Natal no Tinan Foun ho responsabilidade, dialogu, no espíritu toleransia,” apela Komandante Jeral PNTL, Komisariu Jeral Polisia Henrique da Costa liu husi Konferensia Imprensa neebe halao iha edifisiu Komando Jeral, Kaikoli, Dili, Kuarta (24/12/2025)
Komisariu PNTL mos apela ba utilizador estrada publiku atu kuidadu iha trafiku rodoviariu, respeita regra tranzitu nian, no prezerva ema nia vida.
Nia reforsa iha tinan Foun 2026, ema hotu-hotu bele iha determinasaun atu serbisu la kolen ba manutensaun orden publika, protesaun ema no propriedade, no respeitu ba direitus umanus, iha kooperasaun metin ho instituisaun hotu.
Aproveita oportunidade ida nee, Komisariu PNTL mos hatoo ksolok Natal no tinan foun 2026 ba populasaun iha territoriu laran.
“Hau hatoo ksolok Natal no tinan foun 2026 ba imi hotu, ho saude, dame, esperansa no konfiansa iha futuru ida neebe diak ba beibeik ba Timor-Leste,” dehan nia.
Jornalista: Alberto Menezes
Editor: Xistor Mendonça
