DILI, STLTIMORLESTE.com – Tuir Xefe Departamentu Investigasaun Kriminál (DIK) Nasional Komando Jerál Polísia Nasionál Timor Leste (PNTL), Superintendente Xefe Polísia João Belo dos Reis hatete, DIK halo identifikasaun ba ema nain rua (2), tanba suspeitu ba krime tranfiku umanu.
Nia dehan, suspeitu nain 2 nee nuudar nain ba fatin Karoke no Diskote neebe lokaliza iha area Hudi-Laran, Bairo Pite, Postu Administrativu Dom Aleixo, Munisipiu Dili.
“Horiseik DIK halo mos identifikasaun ba sidadaun estranjeiru nain 7, sira nee sai vitima ba hahalok trafiku umanu, tanba sira nee rekruta husi nain ba karaoke no diskoteka iha area iha parte Hudi-Laran, nunee ita bolu ema sira nee mai halo identifikasaun ba sira, hodi husu sira ema neebe mak fo servisu ba sira, ema neebe mak lori sira tama no iha ema nain hira mak ita atu konsidera hanesan vitima ba asaun nee,” hatete Xefe DIK Nasional, Komando Jerál Polísia Nasionál Timor Leste(TL), Superintendente Xefe Polísia João Belo dos Reis ba jornalista sira iha iha Sentru Formasaun Polísia (CFP), Komoro, Sesta (29/11/2024).
Nia esplika, suspeitu nain 2 nee tuir informasaun neebe iha katak, sira nain 2 nee halo rekrutamentu ba feto nain 7 atu servisu, maibe feto sira nee sente sai vitima ba hahalok nee, nunee ekipa sekretu neebe halo vizilansia fatin informa kedan ba Vulneravel Person Unit (VPU) Komando Jeral PNTL hodi fo asistensia ba vitima sira nee.
Nia deklara, husi deklarasaun neebe VPU foti iha ema nain 4 mak konsidera hanesan vitima ba trafiku umanu.
“Nain 4 nee vitima ba trafiku umanu ita foti ona, sira nia deklarasaun ita elabora ona no ohin loraik ita sei aprezenta hotu sira nia auto notisia nee ba Ministeriu Públiku,” nia informa.
Nia hatutan, iha prosesu identifikasaun neebe VPU halo nee iha ema nain 2 mak sai hanesan suspeitu prinsipal.
Nia koalia, prosesu ba sira sei lao hela, vitima nain 4 sei hein prosesu hela, kuandu rezultadu sai dehan sira nain 4 hatan Tribunal, sira tenke hatan Tribunal no kuandu prosesu remata ona mak polísia sei entrega ba Servisu Migrasaun hodi halo deportasaun ba sira.
Entretantu bainhira Ministeriu Publiku (MP) delega fila fali kompetensia ba polísia, nunee PNTL prontu atu kontinua prosesu nee, no ba vitima nain 4 inklui suspeitu sira PNTL haruka fila fali ba uma hodi hein prosesu tuir mai.
(jen)
