DILI, STLTIMORLESTE.com – Komando Polísia Nasional Timor Leste (PNTL) liu Diresaun Servisu Investigasaun Kriminal Nasional (DSIKN) halo prosesu identifikasaun ba Kompanhia ida ho insial A.M neebe mak haruka Timoroan balun ba nasaun Brunei Darusalam no sai vitima ba kazu Tráfiku Umanu.
Hatete Portavoz Komando PNTL, Superintendente Polísia João Belo dos Reis ba jornalista sira liu husi konferensia imprensa iha Komando Jerál PNTL Kaikoli, Dili, Segunda (07/07/2025).
Nia dehan, DSIKN atua seriu kazu Transnacional Crime, tanba nee ajensia sira neebe fasilita Timoroan sai vitima ba krimi trafiku umanu.
Nia tenik, ajensia sira neebe mak fasilita Timoroan sira sai ba rai liur laiha konesimentu husi Governu ka ilegal, PNTL sei investiga no halo identifikasaun ba sira.
“Ohin (07/07) ita sei investiga no bolu halo identifikasaun ba sira, karik los ka lae hafoin ita aprezenta ba Tribunal,” nia informa.
Portavoz nee haktuir katak, vitima sira neebe Kompanhia nee haruka ba servisu too agora sei iha nasaun Brunei Darussalam seidauk fila mai Timor Leste.
“Ohin sira (kompanhia) neebe fasilita Timoroan sai ba liur, ita bolu ona mai hodi halo identifikasaun hanesan Kompanhia nain hamutuk ho nia estrutura, kona-ba Kompanhia nee rasik durante nee halo atividade saida, orsida iha prosesu identifikasaun mak sei determina,” nia esplika.
Nunee, Portavoz PNTL nee dehan, prosesu investigasaun mak sei termina los kompanhia ka ajensia nia atividade lo-loos halao durante nee.
“Prosesu identifikasaun sei termina ninian (kompanhia) lisensa ba saida, orsida prosesu identifikasaun mak sei hetan. Entaun ohin ita bolu ona sira mai hodi foti sira nia deklarasaun, tanba saida mak akontese,” nia deklara.
Nia informa, PNTL deskonfia kompania ida deit. Maibe kona-ba sira nia intensaun rekruta Timoroan sira nee saida, orsida prosesu identifikasaun no investigasaun mak sei hatene no determina.
Iha fatin hanesan, Akademista UNTL, Adérito da Silva deklara, PNTL liu husi DSIKN tenke servisu makaas hodi kaptura sidadaun sira neebe bosok sidadaun Timoroan ba servisu iha nasaun sira hodi sai trafiku umanu.
“Ita nia DSIKN tenke servisu makaas hodi kaptura Kompanhia neebe fasilta ita nia Timoroan ba Brunei hodi servisu, maibe sai fali trafiku umanu iha ema nia rai, tenke investigasaun didiak atu nunee haruka fila ita nia ema sira nee,” nia afirma.
(jen)
