DILI, STLTIMORLESTE.com – Ekipa Servisu Konjunta Polisia Nasionál Timor Leste (PNTL) identifika no detein ona suspeitu neebe mak produs kupon jogus SDSB ilegal, hodi faan ba kliente sira iha area Tasi-Tolu, Dili.
Nia hateten, servisu ekipa operasaun konjunta neebe kompostu husi SIP, SNI inklui J2 konsege halo identifikasaun ba ema sira neebe mak produs kupon jogus SDSB ho ilegal.
“Kona-ba kazu neebe horiseik (01/06), ita hetan informasaun kona-ba kazu neebe mak husi ita ninia ema sira iha terenu, iha operasaun konjuntu ida entre ita ninia SIP, J2 no SNI sira identifika katak, iha jogus ilegais,” hatete Komandante PNTL Munisípiu Dili, Superentedente Xefe Polisia Orlando Gomes ba jornalista sira iha Komando Munisípiu Dili, Kaikoli, Tersa (03/06/2025).
Nia esplika, ekipa operasaun konjuntu halo identifikasaun ba jogus ilegal SDSB neebe mak ema foto copy tutan fali kupon sira hanesan kupon husi amizade ninian nomos husi Badford hodi sira bele fa’an kopon tutan.
Ho nunee liu husi identifikasaun nee mak ekipa operasaun konjuntu kaptura tiha ona suspeitu sira hanesan ho inisial S.A, FFS no BMF.
“Neebe ita halo operasaun, ita kaptura tiha ona suspeitu sira no ita foti evidensia sira ne’e hotu no ita mos evidensia hanesan kupon no osan”, nia espika.
Nia informa, prosesu ba kazu nee, ninia prosesu rejista ona iha Ministeriu Publiku hodi halo kontinusaun ba iha Tribunal.
Kona-ba durasaun suspeitu sira produs kupon ilegal nee, Orlando Gomes deklara, kona-ba durasaun tinan ka fulan sei halo hela prosesu identifikasaun hodi buka hatene tuir.
“Ita sei halo hela prosesu identifikasaun para ita hodi husu hatene tuir sira halao atividade ilegal nee durasaun nee tinan hira no fulan hira ona hodi fa’an bá kliente sira iha Dili laran,” nia relata.
Nia hatutan, maibe ekipa operasaun konjuntu nee horiseik Domingu 01 Junhu tinan nee kaptura ona suspeitu sira no daudaun nee detein ona iha sela Kaikoli, Munisípiu Dili.
“Ita konsege detekta sira, ita deskobre, depois halo kapturasaun, agora daudaun halo ona prosesu no suspeitu sira detein ona iha sela detensaun oras 72 nia laran hodi aprezenta ba Ministeriu Publiku hodi prosesa bá primeira interogatoriu,” katak nia.
Nia haktuir, suspeitu sira ekipa operasaun konjuntu kaptura iha Tasi-Tolu neebe mak faan kopon ilegal ba sidadaun sira.
“Suspeitu sira ita identifika iha na’in 4 neebe mak agora ita hatama iha sela. Ita mos sei halo tan identifikasaun bá suspeitu balu tan neebe mak involve iha kazu ida nee”, nia konklui.
Entretantu, ho kapturasaun suspeitu sira too agora pozisaun husi kompanhia AMIZADE no Bedford seiduk fo sai, ligadu ba kazu produs kupon ilegal hodi faan ba kliente sira.
(jen)
