DILI, STLTIMORLESTE.com – Polisia Nasional Timor Leste (PNTL) hamutuk Institutu Defeza Nasionál (IDN) diskute kona-ba formasaun lideransa ba rekursu umanu nian.
Komandante Jerál Polísia Nasionál Timor Leste ( PNTL), Komisariu Jerál Polísia, Henrique da Costa dehan, iha diskute nee koalia liu kona-ba formasaun lideransa ba rekursu umanu, neebe IDN realiza hela Kursu Estadu Maiór Konjunta Integradu neebe envolve mos ofisiál superior PNTL iha laran.
“Ohin ita halo diskusaun oinsa mak ita bele prepara rekursu umanu sira bele tuir formasaun liu-liu ba ofisial superior hirak neebe foin daudaun hetan promosaun diviza, ida nee ohin ita koalia ona. Komando PNTL sei prepara pedidu ba Ministeriu Interior ho Ministeriu Defeza bele tau iha konsiderasaun,” hatete Komisariu Jerál Polísia, Henrique ba jornalista sira iha Komando Jeral PNTL, Dili, Kuarta nee (02/04/2025).
Nia tenik, fundamental, membru ofisial superior PNTL neebe foin daudaun hetan promosaun diviza nee, Komando PNTL iha obrigasaun tenke prepara formasaun ba sira hodi garante kualidade iha servisu fatin.
“Ita sei halo karta pedidu ba Ministeriu Interior ho Ministeriu Defeza, depois ita sei identifika membru sira nee ho diviza saida mak ita haruka sira ba tuir formasaun, depois remata kursu nee sira fila mai ita kontinua utiliza sira iha instituisaun PNTL iha tempu balun nia laran, maibe membru sira neebe tama idade preapojentasaun ho apojentasaun ita la presiza haruka ona sira ba tuir tan formasaun, depois sira remata kursu ita labele utiliza ona sira, tanba hein ba reforma, entaun ida nee mak ohin ita koalia ho IDN para apoiu formasaun iha kapasitasaun rekursu umanu nian,” nia informa.
Iha fatin hanesan, Diretor Jeral IDN, Guilherme Soares deklara, objetivu husi sorumutu ida ohin ho Komandante Jerál PNTL, Komisariu Jerál Polísia Henrique da Costa koalia kona-ba formasaun sira neebe daudaun nee halao hela iha Institutu Defeza Nasional, liu-liu kona-ba alunus sira bele frekuenta ona kursu Estadu Maior Konjunta Integradu ba dala haat nian.
“Daudaun ofisiál superior membru PNTL nain lima agora tuir hela formasaun iha IDN, entaun ita presiza tan ema atu prienxe vaga hanesan F-FDTL nian, entaun ida nee mak ohin ami diskute no mos kona-ba trabalhu investigasaun sira alunus atu halo tenke bazeia ba vizaun ho misaun husi instituisaun rasik,” nia hatutan.
Nia koalia, Institutu Defeza Nasional (IDN) prontu apoiu formasaun ba kapasitasaun rekursu umanu, tanba Instituisaun Komando PNTL haruka membru sira ba, depois halo karta pedidu ba iha Ministeriu Interiór ho Ministeriu Defeza para bele hetan autorizasaun mak bele tuir formasaun.
“Daudaun nee iha kursu Estadu Maior Konjunta Integradu ba dala haat nee husi Instituisaun F-FDTL hamutuk nain 9 no PNTL agora nain 5, sira hamutuk nain 14 tuir hela formasaun, tanba nee Komando PNTL konvida hau mai iha nee halo koordenasaun oinsa mak bele envolve tan membru PNTL sira neebe seidauk hetan formasaun nee atu tuir hotu,” katak nia.
Entretantu, formasaun kursu neebe daudaun IDN realiza mak kona-ba kursu Estadu Maiór Konjunta Integradu envolve membru PNTL sira husi Postu Superintendente Assistente ho Superintendente, ida nee mak daudaun nee IDN halao hela hodi kapasita rekursu umanu husi Instituisaun PNTL ho F-FDTL nian.
(jen)
