DILI, STLTIMORLESTE.com – Polisia Nasionál Timor Leste (PNTL) liu husi Departamentu Investigasaun kriminal Nasional (DIKN), Segunda nee (25/11/2024) bolu sidadaun Timoroan sira neebe uza batina mean, hodi submete identifikasaun, hafoin prosesa ba Ministeriu Públiku (MP).
Tuir Komandante Jeral PNTL, Komisariu Polisia, Henrique da Costa katak, Komando PNTL bolu ona ema hirak nee mai halo identifikasaun, no sei aprezenta ba Ministeriu Publiku.
“Ita bolu ema hirak nee mai halo identifikasaun, nee kompetensia no knaar polisia nian, iha neeba ita nia kodigu prosesu penal fo dalan ba polisia atu halo asaun ida nee. Tanba husi sira ninia imajen uza batina, hodi publika sai iha media sosial nee, ameasa mos ba iha sira nia aan no ameasa mos ba ema seluk, entaun prevensaun polisia ninian halao ida nee,” dehan nia ba jornalista iha Kuartél Jerál PNTL, Segunda (25/11/2024).
Nia fundamenta, bainhira polisia la halo medida ida nee, entaun ema seluk sei sai vítima ba buat neebe mak sira publika sai iha media sosial.
“Depois imajen ema hirak uza batina mean hodi temi, Amu Dom Carlos Filipe Ximenes Belo ninia naran iha sosial media, ami polisia mos halo kedas komunikasaun ba iha Amu Dom Virgílio Kardeál doŕ Carmo da Silva, liu husi amu Kapelaun PNTL nian, atu nunee husi igreja mak bele halo komunikasaun ba malu hodi haree situasaun nee ba oin halo oinsa,” nia fundamenta.
Nia afirma, medida neebe mak polisia halo nee la depende ba iha keixa husi parte igreja katolika nian, PNTL halo asaun ida nee hodi prevene.
Relasiona ho imajen uza batina padre nian neebe viral iha sosial media, Komando PNTL husu ba iha komunidade sira atu labele halo julgamentu iha sosiedade nia leet, husik polisia halo ninia servisu, publiku hein rezultadu iha loron ikus.
Oportunidade nee Antonio Espíritu Santo klarifika, nia hatais batina mean nee laos atu kontra igreja.
“Imajen nee viral iha sosial media, hau hakfodak, haree ba situasaun nee ema barak mak defama hau inklui hau nia oan sira iha Eropa neeba. Hau atu deklara ba iha pubbliku katak, antes hau mai too iha Polisia, hau mos ba deklara no husu ona hasoru Amu Parokia iha Balide, hau husu deskulpa. Hau nia imajen viral iha sosial media, laos atu kontra igreja Katólika”, dehan nia.
Nia konta, nia parte la hatene maibe ema hirak tama iha organizasaun Igreja Katolika Independente bolu nia ba nia rian nia uma iha Bekora, atu reza hodi kura ema moras liu husi ritual, maibe bainhira too iha fatin atu reza, Senhor ida uza batina mean hanesan padre obriga hotu batina.
“Sira Padre uza batina mean, sira dehan batina nee imi uza deit laiha problema, ami hatais hotu tiha batina mean nee, senhor padre neebe hasai ami nia imajen tau iha media sosial, maibe hau deit la hatene. Tanba ami ba iha fatin ida nee atu reza ba ema moras atu sai diak, mas atu dehan sai fali padre ka Nai lulik nee hau la hatene”, katak nia.
Nia konta, batina neebe sira fo hatais nee lulik, ema labele kaer arbiru, bainhira ema se deit mak kaer ka atu uza sem autorizasaun sei bulak.
(mar)
