DILI, STLTIMORLESTE.com – Komisaun Anti Korupsaun (KAK) hetan apoiu husi Polisia Nasional Timor Leste (PNTL) liu husi Polísia Diresaun Servisu Investigasaun Kriminál (DSIK) halo buska ba sidadaun ida ho inisiál L neebe suspeitadu envolve iha krimi fraude konstrusaun.
Nia dehan, previstu iha artigu 96 no krimi partisipasaun ekonomia negosiu neebe previstu iha artigu 86 husi lei numeru 7/2020, 26 Agostu neebe koalia kona-ba Medida Prevensaun no Kombate Korupsaun ( MPCC).
Nia tenik, buska no aprensaun nee KAK no DSIK halo iha loron Tersa (26/8), tuku 07:30, hodi desloka kedan ba suspeitu nia rezidensia neebe lokaliza Aldeia Nopen, Suku Vila Verde, Postu Administrativu Vera Kruz, Munisípiu Dili, hafoin halo tiha buska no aprensaun ekipa kontinua desloka ba iha rezidensia L ninian iha Aldeia Turleu, Suku Tibar, Postu Administrativu Bazartete, Munisipiu Likisa.
Nia esplika, aprensaun no Buska Domisiliariu neebe KAK no PNTL halo nee bazeia ba mandadu judisiariu husi Tribunal Judisiál Primeira Instánsia Dili ho Numeru Uniku Krime (NUK) 0013/25. CAC. Durante aprensaun no buska nee hetan akompanhamentu husi defeza L, Advogadu Privadu Cancio Freitas.
Hafoin buska, defeza sidadaun inisial L nomos Advogadu Privadu Cancio Freitas hateten, ligadu ho buska no aprensaun ne’ebé KAK ho DSIK halo ba nia kliente, tanba relasaun ho krimi fraude konstrusaun no partisipasaun ekonomia.
“Maske nunee ita la hatene faktu nee oinsa, no tanba saida mak buat sira nee akontese, hodi ekipa mai buska domilisiariu nee, maibe tuir buat neebe hau hatene, CAC no Diresaun Servisu Investigasaun Kriminál halo buska no aprensaun nee tanba iha mandadu husi Tribunál neebe mak autoriza Polísia no KAK atu halo sira nia servisu para bele mai rekolha informasaun sira neebe mak relasaun ho krimi fraude konstrusaun no partisipasaun ekonomia, ida nee mak ohin sira halo,” hatete Advogadu Privadu, Cancio Freitas ba jornalista sira iha Vila Verde, Tersa (26/08/2025).
Tuir Advogadu nee katak, nia kliente nee emprezariu ida depois investigasaun mak klareza.
“Hau nia kliente nia estatutu iha prosesu ida nee seidauk konstitui ba suspeitu ka arguidu,” nia informa .
Nia deklara, razaun buska no aprensaun nee atu mai rekolha informasaun kona-ba relasaun krimi fraude konstrusaun, partisipasaun ekonomia.
“Agora hau nia kliente seidauk tama iha faze ida tantu suspeitu no arguidu,” nia tenik.
Hatan kona-ba nia kliente kaer projetu irigasaun ida iha Suku Seloi Kraik, Postu Aleiu Vila, Munisípiu Aileu mak la finaliza nunee mak hatan ba krimi fraude konstrusaun no partisipasaun ekonomia iha negósiu, depois kona-ba informasaun nee nia labele fo sai lai, tanba kestaun hirak nee iha hela prosesu laran.
“Kestaun nee iha hela faze investigasaun no investigasaun mak bele hatene, tanba hau nia kliente nia kompanhia halo atividade barak. Ita kumpri deit mak buska domilisiariu neebe mak Tribunal notifika mai iha hau nia kliente iha 30 Julhu 2025 no ohin Polísia sira mai halo nia servisu,” nia koalia.
Nia afirma, iha buska no aprensaun nee KAK no PNTL arola dokumentu sira neebe sei sai hanesan auto de notisia.
(jen)
