DILI, STLTIMORLESTE.com – Polisia Nasional Timor Leste (PNTL) liu husi Komando PNTL Munisipiu Dili kaptura joven nain tolu (3) no halo kedas detensaun ba joven nain rua (2) neebe mak deskonfia sai autor ba kazu tuda ekipamentu pezadu iha alargamentu estrada iha area Bekora nian.
Nia dehan, iha duni kazu insedente ida iha ponte maufelu ninian, wainhira kondutor tun husi eskavator no kondutor eskavator nee halo hela servisu kait uma sira neebe mak besik iha estrada, depois iha ita nia sidadaun balu neebe mak foti fatuk tuda eskavator vidru rahun.
Nia tenik, iha akontesimentu ida nee, autoridade seguransa polisia halo kedas intervensaun hodi kaptura suspeitu nain 3 lori kedas ba iha eskuadra Kristu Rei hodi halo indentifikasaun no nain 2 mak konstitui ba iha arguidu.
“Sira nain rua neebe mak konstitui sai arguidu, ita halo kedas detein durante oras 72, nain ida mak ita halo identifikasaun ita husik fali ba uma, maibe nain rua mak detein ona, para halo prosesu ba oin aprezenta ba tribunal,” hatete Komandante PNTL, Munisipiu Dili, Superientendente Xefe Polisia Orlando Gomes ba jornalista sira iha kampu Bekora, Tersa (03/02/2026).
Nia esplika, suspeitu nain tolu nee ho inisial AJ, SR no ida seluk seidauk hatene inisial, maibe polisia identifika ona sira nia indentidade. Joven nain tolu nee hela duni besik iha area ponte Maufelu ninian.
“Iha akontesimentu nee eskavator atu kait ona uma sira nee mak sira foti fatuk hodi tuda tiha vidru eskavator nian rahun. Akontesimentu nee akontese iha tuku 7 ho balun,” nia deklara.
Nia haktuir, ho akontesimentu nee mak kontrola husi polisia hamutuk ho ekipa SEATOU hodi prezensa iha alargamentu estrada nee atu bele asegura seguransa ba iha se deit inklui fo seguransa ba SEATOU nomos fo seguransa ba iha sidadaun sira afeitadu, nunee labele mosu dezentendimentu ruma no labele mosu krime ruma iha fatin neeba.
Orlando informa, prezensa PNTL iha alargamentu estrada ne’e importante tebes, nunee asegura seguransa metin atu nunee projeitu refere kontinua lao nafatin ba oin.
“Ita konsidera hahalok joven sira nee klaru katak, bainhira tuda ona vidru rahun nee krime tenki halo prosesu ba oin, tanba nee mak ita foti kedas asaun kaptura kedas halo prosesu no detein kedas para prosesa ba iha tribunal”, nia konklui.
Entertantu, Primeiru Ministru (PM) Kay Rala Xanana Gusmão husu Komando PNTL atu prosesa lalais autór sira neebe involve iha asaun krime hodi tuda rahun ekipamentu pezadu empreza Rubic Unipessoal, Lda neebe utiliza hodi halo alargamentu bá estrada protokolu iha area Bekora, Dili, Segunda 02 Fevereiru 2026.
PM Xanana husu atu prosesa autór sira nee hodi hatene loloos kronolojia ho motivu no tenke responsabiliza asaun ne’ebé sira komete. Oras nee daudaun PNTL detein ona autór sira iha eskuadra Becora nian hodi hein atu submete bá prosesu investigasaun.
IX Governu Konstitusionál halo alargamentu ba estrada Becora ho objetivu prinsipál atu redus engarrafamentu no hamenus problema tráfiku, tanba Becora hanesan área ho movimentu transporte públiku aas tebes.
Aleinde nee, atu hasae seguransa ba motorista, ema lao ain, aumenta kapasidade estrada atu bele simu transporte públiku barak-liu inklui hadia drainajen hodi evita inundasaun iha tempu udan, apoia dezenvolvimentu ekonómiku lokál tanba fásil liu atu assesu ba merkadu, eskola no servisu.
Depois molok halo alargamentu, Governu lidera husi Primeiru Ministru rasik akompanha husi ekipa konjunta kompostu hosi Ministeriu Obras Publikas (MOP), Sekretaria Estadu Asuntus Toponímia no Organizasaun Urbana (SEATOU) no Autoridade Munisípiu Dili halao uluk sosializasaun ba populasaun iha area Becora kona-bá prosesu tomak alargamentu estrada nee.
(jen)
