DILI, STLTIMORLESTE.com – Polisia Nasional Timor Leste (PNTL) liu husi ekipa konjuntu Forsa Unidade FALINTIL, Segunda kalan (04/11 2024), iha tuku 12:00, kaptura suspeitu nain 30 resin ho evidensia motor 12 neebe deskonfia envolve grupu naok motor iha territoriu Timor Leste.
Tuir informasaun neebe STL asesu katak, suspeitu nain 30 resin hafoin kaptura, Servisu Informasaun Polisia halo prosesu identifikasaun, identifika suspeitu nain 15 mak sai autor prinsipal ba naok motor inklui nain 1 neebe sai hanesan tekniku modifikador motor, autor hirak seluk inklui feto lubun ida SIP haruka fila tanba la envolve iha kazu naok nee, enkuantu feto nain 3 iha identifikasaun deskobre sira mak utiliza no sai nain ba motor neebe suspeitu sira naok.
Suspeitu hamutuk nain 15 inklui feto nain 3, hafoin remata identifikasaun husi SIP, ekipa konjuntu kontinua entrega suspeitu sira ho evidensia motor 12 ba Departamentu Investigasaun Kriminál Nasional hodi halao prosesu investigasaun, nunee submete suspeitu sira ba sala detensaun hodi kumpre oras 72, hafoin aprezenta ba Ministériu Públiku.
Entretantu vítima Elio Magno hateten, ninia motor lakon iha fulan kotuk, iha uma Fomentu II, maibe agradese tebes ba Servisu Informasaun Polisia konsege hetan fila fali motor husi autor neebe mak naok.
“Hau orgulhu ho ita ninia polisia nia servisu, dala ida tan hau louva no agradese, nafatin servisu profisional, tanba nasaun no povu ida nee presiza tebes PNTL ninia servisu”, katak nia.
Nia dehan, kona-ba suspeitu sira, presiza duni haree tuir lei kondena, nunee evita kazu naok iha ita nia nasaun.
Nia konta, nia motor lakon iha uma, iha fulan Agostu fulan kotuk liu ba, lakon iha oras tuku 5:00 madrugada, agradese tanba hetan fali ona.
(mar)
