DILI, STLTIMORLESTE.com – Iha loron 27 fulan Marsu, Polisia Nasional Timor Leste (PNTL) Komemora Aniversariu ba dala 25 eziste iha Timor Leste, iha loron espesial nee Prezidente Republika Jose Ramos horta hatoo parabens ba Estadu Timor Leste, tanba harii Instituisaun PNTL.
Prezidente Republika Jose Ramos Horta hatoo liafuan parabéns nee ba jornalista sira, bainhira remata distribui nesesidade baziku ba komunidade Kbiit natoon, iha Kovalima, Kuarta (26/03/2025).
“Tinan ida nee Primeiru Ministru mak Prezide, ami konvina malu ho Primeiru Ministru, primeiru parabens ba Estadu, laos parabens deit ba PNTL nuudar instituisaun maibe parabens mos ba estadu, tanba organizasaun estadu iha tinan 20 resin mak harii PNTL ho nia espesialidade barak para garante Ordem Publika iha rai laran,” dehan PR Horta.
Prezidente Republika hatete, nia iha esperiensia haree sistema polisia no F-FDTL iha Nasoens Unidas nomos Guine Bisau.
“Hau haree ema ida iha esperiensia klean pelumenus iha sistema Nasoens Unidas, hau uluk iha Guine Bisau, Afrika, aprezenta Sekretariu Jeral ONU hau nia mandatu mos tau matan ba seguransa iha rejiaun Afrika Osidental tomak, haree mos reforma polisia forsa armada iha Guine Bisau,” katak PR Horta.
Nunee mos iha rai laran Prezidente Republika akompanha kedas iha tinan 1975 momentu FALINTIL, Prezidente lee no akompanha.
“Depois Sekretariu Jeral ONU rasik mos iha ullitimu kondisaun ho ONU Prezidente Painel Altu Nivel operasaun, nee halo revizaun forum da Paz ONU nia iha mundu tomak husi 2014, Polisia no defeza hau konhese, hau bele hatete instituisaun rua nee PNTL no F-FDTL servisu diak, enjeral servisu diak,” katak PR Horta.
Prezidente Republika hatete, PNTL no F-FDTL servisu diak liu rai barak-barak iha mundu nee, tanba Prezidente temi buat neebe nia halo bele halo komparasaun, no F-FDTL mos halo servisu diak ho profisional.
“Parabens ba PNTL ba sira nia tinan,” dehan Prezidente Republika Timor Leste.
Nunee mos oras nee PNTL selebra aniversariu ba dala 25, saida mak PNTL presiza halo ba oin, hatan ba kestaun nee Prezidente hatete, asuntu ida nee bele koalia ho Primeiru Ministru nomos Ministru Interior no komando PNTL, hodi hatene PNTL ba oin presiza tan saida, maibe hatete deit nee responsablidade knaar Governu.
(eme)
