DILI, STLTIMORLESTE.com – Polisia Nasional Timor Leste (PNTL) sei kontinua fo seguransa ba Parlamentu Nasional (PN), sei wainhira estudante sira atu halo manifestasaun.
Komandante PNTL Munisipiu Dili, Superintendente Xefe Polisia Orlando Gomes dehan, Komando Munisipiu Dili nafatin antisipa ba estudante sira.
“Komando Munisipiu Dili nafatin antisipa ba estudante sira no ita nafatin fo seguransa ba iha PN, para nunee labele hamosu anarkizmu ruma iha fatin ida nee,” hatete Orlando Gomes ba jornalista sira iha PN, Kuarta (03/09/2025).
Nia esplika, relasiona ho manifestasaun too agora Komandu Munisipiu Díli seidauk iha pedidu, maibe kuandu iha manifestasaun tenke tuir nafatin lei neebe mak iha.
“Ita tenke disiplina bazeia ba regras neebe mak iha Komandu Munisipiu Dili, ita nafatin tau seguransa iha PN, atu nunee asegura situasaun sira nee lao diak. Komandu Munisipiu Dili ita hatun forsa rezerva mai iha fatin para asegura situasaun iha terenu, depois mak ita haree grau ameasa sira nunee mak ita analiza, mak ita bele hatun tan forsa sira seluk,” nia dehan.
Komando PNTL Munisipiu Dili informa, ema hotu iha liberdade para halo manifestasaun maibe nafatin tuir regras neebe mak iha, tuir lei manifestasaun nian nee.
Nia koalia, hahu oras tuku 09:00 membru PNTL forsa rezerva nomos husi Batailaun Ordem Publika (BOP), hahu halao ona seguransa iha PN oin.
Iha fatin hanesan liu husi Konferensia Imprensa Porta-vos Natalizio Nunes, Universitáriu Timor Lorosae (EUTL) Kuarta (03 Setembro 2025) iha Kampus Central, Universidade Nasional Timor Lorosae (UNTL) kontra desizaun polítika neebe reprejentante povu iha uma fukun plenaria, aprova orsamentu ho montante hamutuk US$ 4.2 milloens hodi sosa kareta prado ka luxu hamutuk unidade 65 ba deputadu hirak iha PN ho fundamentu maka, kareta hirak nee avaria hotu ona, la sosa kareta luxu ba oin ema lakoi ona deputadu. Razaun seluk maka sae ba mai hodi halo fiskalizasaun ikus-liu maka kustu manutensaun boot liu duke sosa kareta foun.
“Razaun sitada mak ami EUTL ho nia abreviatura lamenta tebes ka diskorda total ba politika Parlamento nasional nian neebé atu sosa kareta luxu ou prado ba deputadu 65.Tamba ita haree no observa politika sosa kareta prado ba deputadu sira laos foin primeira vez, maibe sai hanesan ona kustume ka kultura desde governasaun dahuluk too mai IX governu,” nia deklara.
Nia informa, laos sosa deit kareta prado, maibe simu subsidiu oioin no direitu regalia sira hanesan osan ba manutensaun, alojamentu, laptop, tratamentu saude, osan pulsa no seluk tan neebe privileizu tebes ba deputadu sira iha PN.
Nia informa, Deputadu sira iha PN laiha ona funsionalidade hodi diskute problema sosial neebe akontese iha estadu RDTL ida nee, hanesan ospital sira laiha aimoruk neebe sufisiente hodi trata pasiente sira, menus kareta ambulansia, edukasaun hakdasak liu, insufisiensia material no infraestrutura sira hanesan meza, kadeira, biblioteka, sorin ida la rekoinese mos professor neebe durante tinan naruk vonlutariu, la kapasita ka mellora professor sira nia abilidade hanorin liu husi formasaun.
Kazu mál nutrisaun kontinua sae makaas too 47%, taxa desempregu kada tinan kontinua sae ba bebeik infraestutura bazika hanesan estrada, bee-mos no eletresidade nafatin sai preokupasaun ba povu liu-liu iha area rural populasaun neebe afetadu husi eviksaun forsada neebe dadaun ne’e barak seidauk hetan idemizasaun.
“Problema hirak nee mak ami Estudante Universidade Timor Leste lamenta tebes hodi hatoo ezisensia katak, halakon kultura sosa kareta luxu no direitu regalia sira seluk, hodi investe fila-fali ba setor produtivu sira hanesan edukasaun, saude, agrikultura, turizmu no infraestrutura sira iha baze hanesan estrada, eletrisidade no sira seluk tan,” nia deklara.
Estudante sira mos husu ba PN halakon tiha lei pensaun vitalisia neebe la fo benefisiu ba povu, maibe fo bokur deit ba ema balun deit. Husu mos ba PN hodi altera tiha lei manifestasaun liu klaúzula ida kona-ba restrisaun 100 metrus, tanba ida nee hamate demokrasia.
Jornalista: Jeniche da Costa
Editora: Domingas Gomes
