DIILI, STLTIMORLESTE.com – Xefe Departamentu Saúde Polísia Nasionál Timor Leste (PNTL) Superintendente Assistenste Polísia, Analita do Rego Fatima hateten, Komando PNTL liu husi Departamentu Saúde servisu hamutuk ho Diresaun Nasionál Prevensaun Kontrola Moras Hadaet no Laboratoriu Nasionál Ministeriu Saude, hasai teste raan ba membru PNTL sira neebe mak destaka iha Komando Jeral PNTL Kaikoli, nunee bele hatene sira iha moras HIV-SIDA, Cipilis no hepatitis ka lae.
Nia dehan, liu husi kooperasaun nee konsege halo ona teste ba membru komandu PNTL Munisípiu Bobonaru, Kovalima, Rejiaun Administrativu Espesial Oekusi (RAEOA), Dili, ikus liu mak membru PNTL neebe destaka iha Komandu Jeral PNTL Kaikoli.
“Ami nia atividade ohin nee halo teste ba membru PNTL hotu, atividade nee ita laos foin mak halo. Ohin ita kontinua halo servisu hamutuk ho Ministeriu Saude Diresaun Programa Moras Hadaet hanesan HIV-Sida, cipilis, atu halo teste ba membru polísia sira-nia saude, liu-liu atu hatene karik ita nia membru balun sofre moras hadaet ka lae,” hatete Analita do Rego Fatima ba jornalista sira iha Komandu Jerál PNTL Kaikoli, Segunda (01/09/2025).
Nia dehan, atividade sira hanesan nee husi PNTL no MS halo teste ba membru sira iha Bobonaru, Kovalima, ho RAEOA , Unidade Espesiál Polísia (UEP), Kompania Operasaun Espesiál, Komandu Munisípiu Dili no membru sira neebe mak destaka iha Kuartel Jeral.
“Ita iha tarjetu 600 pesoas husi Ministeriu Saude, agora ita alkansa ona numeru 300, tanba ba Munisípiu tolu nee kompostu husi membru nain 100. Entaun ita iha ona ema nain 300, no husi laboratoriu nasionál atu aumenta tan ema nain 100 no ohin iha nee hamutuk mak iha ona ema nain 50 mak halo ona teste ba sira, espera sei atinji númeru neebe husi Laboratoriu Nasionál husu,” nia esplika.
Iha fatin hanesan Ofisial HIV Testing Service Simao Lopes Pereira hateten, PNTL koopera ho Ministeriu Saude ho objetivu atu halo teste ran ba membru PNTL.
Tanba nee ekipa Ministeriu Saude kompostu husi Diresaun Nasionál Prevensaun Kontrola Moras Hadaet no Laboratoriu Nsional, mai iha Kuartel Jeral PNTL hodi hasai membru PNTL sira nia ran hodi ba halo teste, hodi haree moras hadaet sira HIV-SIDA cipilis no hepatitis.
Nia informa, se membru PNTL balun mak pozitivu hetan moras tolu mensiona, entaun parte saude sei koopera ho saude PNTL hodi buka solusaun ba sira.
Jornalista: Jeniche da Costa
Editora: Domingas Gomes
