DILI, STLTIMORLESTE.com – Durante semana ida hahu husi loron 09 too 16 Novembru tinan nee, Ministeriu Interior (MI) liu husi Polisia Nasional Timor Leste (PNTL) rejistu kazu Krime hamutuk 54, husi numeru nee Kapital Dili rejista kazu aas liu ho total 38.
Porta Voz Seguransa Ministeriu Interior, Superintendenti Polisia João Belo dos Reis dehan, durante periodu mensionadu PNTL rejista kazu krime iha sistema jestaun insidente ka incident Management System (IMS) kazu hamutuk 54, ho tipu kazu 5 neebe rejista sei aas nafatin.
“Husi dadus kazu krime 54 iha leten, Kapital Dili rejista kazu aas liu ho total 38 no tipo krime violenisa domestika akontese iha Dili 17, kazus sai nafatin krime neebe okupa kazu aas liu iha Timor Leste husi loron ba loron,” hatete nia ba jornalista sira liu husi konferensia imprensa iha salaun MI, Kinta (20/11/2025).
Nia esplika, situasaun atual seguransa nasional durante semana ida nee situasaun seguransa nasional jeralmente konsidera estável, ho kontrolu efisiente husi instituisaun PNTL ho koperasaun masimo husi autoridade lokal sira nomos parseiru sira hodi ajuda iha prevensaun konflitu nivel lokal nian.
“Ita nia Policia kontinua realiza patrulamentu, vigilánsia no prevensaun hodi kombate krime konvensional, organizadu no krime transnasional. Operasaun hirak neebe polisia halo konsege detekta no prevene aktus ilisitus krime sira,”nia tenik.
Iha fatin ketak Komandante Komandu PNTL Munisipiu Likisa, Superintendente Polísia Paulino Carmo Pereira informa, PNTL liu husi Komando PNTL Munisipiu Likisa, rejistu kazu krime agresaun fiziku simples hamutuk 10.
“Munisipiu Likisa iha krime ita rejistu nee barak liu agresaun fiziku simples maka numeru aas ituan fulan ida 10,”nia deklara.
Nia koalia, depois numeru tuir mai kazu violensia domestika nomos kazu asidente inklui tipu seluk neebe sempre akontese iha Munisipiu Likisa.
“Munisipiu Likisa nia numeru krime sae mak 20 depois tun fali, tanba ita sempre halo patrollamentu preparasaun neebe makaas, para ita buka konsege redus krime sira nee,” nia deklara.
Nia afirma, prosesu ba kazu sira nee hanesan bai-bain, kazu hotu-hotu ba Ministeriu Públiku (MP) depois tribunal prosesu tuir lei neebe vigor iha pais ida nee.
Jornalista: Jeniche da Costa
Editora: Domingas Gomes
