DILI, STLTIMORLESTE.com – Polisia Nasionál Timor Leste (PNTL) liu husi Komando PNTL Munisípiu Dili optimista katak, iha tinan nee konflitu sira iha kapital Dili hahu menus tanba kontrola makaas, kompara ho konflitu iha tinan-kotuk nian neebe konsidera barak.
Hatete Komandante Munisípiu Díli, Superintendente Xefe Polísia Orlando Gomes ba jornalista sira iha Komando Munisipiu Dili Kaikoli Dili, Kinta nee (26/06/2025).
Nia dehan, hahu husi inisiu fulan Janeiru too mai iha Junhu tinan nee, konflitu iha fatin publiku entre joven sira hahu menus, tanba hetan vizilansia makaas husi polisia sira. Tanba nee ho konflitu neebe menus, Komandante Munisípiu Dili nee orienta ona membru polisia sira atu mantein kontola seguransa iha fatin sira neebe mak identifikadu risku ba konflitu.
“Kona-ba situasaun jeral iha Munisípiu Dili komando orienta nafatin ba iha ita nía eskuadra sira no ita nia tranzitu para kontinua monitoriza no akompanha situasaun liu husi patrulhamentu iha tempu kalan no loron, nunee atu observa situasaun hotu atu halo prevensaun ba kualker krimi ka konflitu neebe mak mosu,” nia espilika.
Komandante Munisípiu Dili nee promete katak, sei halo esforsu oin-oin hodi bele neutraliza situasaun hotu-hotu iha Dili laran.
“Ita mos lansa ona ita nía servisu informasaun polisia nian, tantu husi informasaun sekreta konjuntu ninian tun iha terenu no ita nía patrulhamentu husi eskuadra no forsa rezerva sira nafatin tun iha terenu iha komunidade nia leet, halo movimentu atu asegura situasaun,” nia informa.
Nia deklara, problema balu nafatin mosu, maibe Autoridade Seguransa kontinua nafatin halo vizilansia iha tempu kalan no loron ba iha bairu-bairu sira, atu minimiza problema konflitus sira neebe mak mosu.
Nia fundamenta katak, durante nee situasaun iha Dili lao ho diak, maske iha problema pesoal no partikular sira mak mosu, maibe PNTL kontinua nafatin halo vizilansia hodi halo prevensaun bá konflitus
.
Nia hatutan, konflitu iha Dili hahu menus kompara ho tinan kotuk neebe akontese iha fati-fatin.
“Situasaun konflitus sira akontese iha tinan kotuk sai hanesan referensia ida mai iha komando, para atu nunee bele ativa makaas vizilansia hodi bele reduz ba konflitus sira nee. Uluk neebe mak sae agora dadaun hahu menus, tanba ita-nia koloka OPS no patrulhamentu husi eskuadra sira tun iha terenu atu halo prevensaun bá konflitus sira,” katak nia.
Enkuantu Komando PNTL Munisípiu Dili seidauk sukat persentajen konflitus entre tinan kotuk nomos iha tinan nee iha bairu-bairu sira iha Dili laran.
“Ita seidauk iha persentajen, maibe ita haree katak situasaun lao diak”, nia konklui.
Iha fatin ketak, Xefe Suku Kaikoli, Hipolito Marques Sarmento infoma, Suku Kaikoli situasaun lao diak durante nee, tanba joven Suku Kaikoli seidauk halo problema boot, tanba Suku sempre fo avizu ba sira labele kria problema iha Suku.
“Ita sempre fo hanoin ba ita nia joven sira katak, labele kria problema iha Suku, no labele tur iha dalan ninin sira nee hodi hemu tua halo problema, ha’u garante katak durante nee laiha problema,” nia afirma.
(jen)
