DILI, STLTIMORLESTE.com – Polisia Nasional Timor Leste (PNTL) liu husi Departamentu Investigasaun Kriminal (DIK) prende sasan kontra bandu husi nasaun Kambodia tama mai Timor Leste (TL).
Porta voz PNTL, Superintendente Polisia, João Belo dos Reis dehan, hetan kontaktu husi Alfándega atu halo atuasaun ba kontentor 20 fit ida neebe mai husi nasaun Kambodia, tanba deskonfia iha sasan kontrabandu iha neeba.
“Investigasaun Kriminal aprosima idetifika katak kontentor refere ho lisensa ATM neebe nia atu hatama Tixu, maibe iha laran sigaru karton hamutuk 4.020 mak ita detekta,” hatete Superintendente Polisia João Belo liu husi Konferensia Imprensa neebe halao iha Kuartel Jerál PNTL Kaikoli, Dili, Segunda (14/04/2025).
Nia esplika, PNTL liu husi Departamentu Investigasaun Kriminal halo kedas prosesu no lori ba aprezenta ba Ministeriu Publiku (MP).
“Suspeitu neebe ita identifika iha atividade krimi nee mak inisial MP, DCX, ita sei aplika artigu sira iha lei Timor nian nee ba suspeitu sira, nunee kontinua nia prosessu investigasaun,” nia deklara.
Iha fatin katak, Akademista Universidade Nasional Timor Lorosae (UNTL), Adérito da Silva informa, sigaru ilegál nee husi fronteira tama mai Timor nee barak, maibé PNTL seidauk identifika.
“Ita haree negosiante sira neebe faan iha Merkadu Taibesi, nee sira faan sigaru Surya, Esse no Segaru seluk tan, neebe Estadu bandu labele faan iha ita nia rai, maibe ita haree sei kontinua faan, tanba polísia nia servisu iha Fronteira no kapitál seidauk masimu,” nia afirma.
(jen)
