BAUKAU, STLTIMORLESTE.com – Komando Polisia Nasional Timor Leste (PNTL) Munisipiu Baukau preparadu, hodi asegura loron finadu iha tinan ida nee.
Deklarasaun nee hatoo husi Komadante Komando Polisia Munisipiu Baukau, Superintendente Xefe Polisia, Antonio Maria De Sa ba jornalista sira, hafoin partisipa iha eventu desportu komunitariu neebe realiza iha Suku Soba, Postu Administrativu Laga, Munisipiu Baukau, Tersa nee (22/10/2024).
“Eventu importante neebe sei mai, liu-liu dia 01-02 Novembru, komando preparadu atu asegura situasaun. Ita identifika hotu ona fatin semiteriu sira risku oinsa Komando atu koloka membru sira,” dehan Antonio.
Komadante Munisipiu nee sublina, daudaun nee liu husi ekipa operasaun identifika ona fatin espesial ba loron finadu nian, risku ba konfrontu mak hanesan semiteriu Bibidala, Uailili inklui mos ensinu baziku Nu.02, iha Postu Administrativu, Baukau Vila.
Tanba fatin refere tinan 2022 kuaze akontese ona konfrontu entre joven ho joven bainhira kondisaun lanu tenta perturba situasaun, maibe parte seguransa polisia konsege hakalma.
De Sa fundamenta, Komando Polisia Munisipiu Baukau sei hasae volume destakamentu membru Polisia iha kada semiteriu hodi fo seguransa ba komunidade sira iha loron finadu tempu kari aifunan no sunu lilin ho hakmatek, tanba loron refere sai ona kultura Timor nian neebe kada tinan ema hotu selebra iha nia hela fatin.
“Loron boot evita hemu lanu, labele lori sasan kroat ba semiteriu iha neeba, so autoriza mak lori deit lilin hodi sunu fo prestasaun omenjen Gloria ba ita nia matebian sira, autoridade seguransa matein regras neebe mak inpoin iha lei, polisia nafatin kontrola ho rigor,” nia akresenta
Komadante nee deklara, bainhira membru destakamentu sira detekta komunidade neebe ba semiteriu iha loron finadu lori sasan kroat, parte seguransa sei asegura hodi prosesu tuir lei neebe vigora iha Timor Leste, maibe garante situasaun durante selebrasaun loron finadu iha Munisipiu Baukau se lao kontroladu, tanba daudaun ekipa Task Force hahu ona patrulhamentu lao ain, inklui auto stop ba transporte sira halo identifikasaun ba sasan kroat.
Husu komunidade hotu iha Munisipiu Baukau atu evita lanu iha tempu finadu, maibe ho fuan hodi tane aas loron matebian sira nian ho dignu no fo Gloria no onra iha momentu selebrasaun.
(EST 2)
