DlLI, STLTIMORLESTE.com – Polisia Nasionál Timor Leste (PNTL) daudaun nee hahu diskute hamutuk hodi halo preparasaun ba jogu desportivas entre nasaun Comunidade dos Países de Lingua Portuguesa (CPLP) neebe sei realiza iha estadiu Munisípiu Dili iha tempu badak.
“Ita mos ohin hamutuk iha nee koalia kona-ba preparasaun ita nia ba iha eventu CPLP nian neebe sei realiza iha ita nia rai, hahu husi 14 too 29 Julhu, entaun tenke prepara forsa diak liu tan atu nunee bele asegura seguransa iha eventu nee,” hateten Komandante Jerál PNTL, Komisariu Jerál Polísia Henrique da Costa ba jornalista sira, hafoin remata avaliasaun servisu iha CFP, Komoro, Kinta (10/07/2025).
Komisariu Jerál PNTL nee konsidera katak, eventu CPLP nee laos eventu desportiva deit, maibe iha mos iha eventu sira seluk hanesan kultura ninian nomos iha enkontru ruma tan karik.
“Entaun ida ne’e ita persiza asegura seguransa ba eventu ida nee ho diak, nunee bele fo atendimentu ka bele asegura labele mosu krimi ruma nomos tenke organiza mos kareta no motor hodi labele mosu engarrafamentu,” nia esplika.
Nia tenik, iha jogu CPLP iha atividade barak mak sei halo durante semana ida ka rua hahu husi 14 too 29 Julhu, entaun Komando Munisípiu Dili mak tenke orienta no koloka membru sira balu ba iha Aeroportu Prezidente Nicolau Lobato.
Nia deklara, tenke asegura alta entidade sira husi rai liur nomos asegura ba jogador sira no sira seluk tan, nunee eventu boot nee bele lao ho susesu, nunee labele halo ema kestiona servisu polísia nian.
“Hakarak atu hatete katak, ba sira neebe servisu iha Aeroportu liu-liu komandante Munisipiu Dili, Komandante Tranzitu ninian hatudu idak-idak nia performansia diak,” nia konklui.
Entretantu, iha loron Kuarta 09 Julhu 2025, Segundu Komandante Jerál Polisia Nasionál Timor Leste (PNTL), Komisariu Polisia Pedro Belo halao enkontru ho Koodenador Jeral jogu Desportu CPLP atual Sekretariu Estadu Arte no Kultura Jorge Soares Cristovão hamutuk ekipa sira halo diskusaun ba preparasaun seguransa ba eventu internasional jogu desportu CPLP.
Iha enkontru nee koalia kona-ba preparasaun seguransa asegura bainaka alta entidade nasional no internasional ho partisipante sira husi nasaun membru CPLP neebe sei partisipa iha eventu internasional jogu desportu CPLP epoka tinan 2025 neebe sei realiza iha loron 17 too 27 Julhu 2025, no Timor Leste hanesan uma nain.
Entretantu, iha sorumutu nee partisipa husi Komandante Komando Operasaun PNTL Superintendente Xefe Justinho Menezes reprenzenta UEP, PNTL Munisipiu Dili ho ekipa komisaun organizadora ba jogu Desportu CPLP epoka 2025.
(jen)
