DILI, STLTIMORLESTE.com – Polisia Nasionál Timor Leste (PNTL) preparadu ona fo seguransa ba selebrasaun misa tinan ida vizita Maktoban Sua Santidade Papa Francisco mai Timor Leste, iha tuku 06:00 loraik, neebe sei halo iha Tasi-Tolu.
Komandante Munisípiu Dili (KMD), Superintendente Xefe Polísia, Orlando Gomes dehan, selebrasaun seguransa misa tinan ida vizita Sua Santidade Papa Francisco mai TL neebe sei halao iha Tasi-Tolu nee, Komando PNTL Dili hetan apoiu husi Unidade Espesial Polísia (UEP), Unidade Polísia Maritima (UPM) no Komandu Jeral, atu nunee bele garante seguransa ba selebrasaun misa tinan ida vizita Sua Santidade Papa Francisco mai TL.
“Ohin ita halo enkontru no brifing ona ba membru PNTL sira, horiseik preparadu ona hodi seguransa masimu ba misa tuku 06:00, atu nunee selebrasaun nee mos lao diak, movimentu ita nia sarani sira iha kapital Dili, nomos sarani sira husi Munisípiu seluk neebe mak mai iha kapital Dili mos lao ho diak no organizadu,” afirma Komandante Munisípiu Dili (KMD), Superintendente Xefe Polísia, Orlando Gomes ba STL iha nia knaar fatin, Kuarta (10/09/2025).
Nia hatete, identifika ona parajen ba sarani sira neebe husi munisípiu atu mai partisipa misa iha Tasitolu, liliu ba sarani husi parte Oeste sira sei mai konsentra iha Pelican Paradise. Sarani sira husi parte Leste sei okupa Tasitolu nomos kampu de Aeroportu nian, atu nunee husik dalan luan atu ema bele halo movimentu ba mai ho livre inklui transporte mos ba mai ho livre.
Komando PNTL nee husu ba sarani hotu hamutuk atu garante situasaun sai diak no seguru ba ema hotu.
“Ami sei halo servisu ho diak liu kontrola movimentu transporte ho diak, tanba polísia tránzitu Dili kordena ona ho tránzitu nasionál atu kontola dalan, nunee transporte bele lao normal,” nia deklara.
Nia koalia, transporte motor no kareta ikus ikus nee barak, maibe polísia nafatin halo ninia servisu hodi asegura fasilita dalan sira nee, hodi fo espasu ba transporte sira seluk bele lao hanesan baibain.
Jornalista: Jeniche da Costa
Editora: Domingas Gomes
