DILI, STLTIMORLESTE.com – Polisia Nasional Timor Leste (PNTL) presiza halo atuasaun ba sidadaun neebe mak sunu fugetis iha tempu kalan hodi perturba ema nia deskansa, liu-liu ba labarik kiik sira.
Sidadaun Grigorio Almeida ba STL iha Bairo Pite, Kuarta nee (04/12/2024) hatete, laos bandu sidadaun sira sunu fugetis, maibe diak liu sunu tuir nia tempu. Agora seidauk tama natal, komunidade sira kalan kalan sunu ona fugetis halo tarutu makaas, ida nee fo risku ba maluk seluk neebe moras inklui labarik kiik sira.
“Tanba nee husu Seguransa liu-liu PNTL atu halo atuasaun ba sidadaun sira nee, nunee labele perturba ema nia deskansa iha kalan, liu-liu inan aman neebe mak moras presiza deskansa nomos labarik kiik sira, bele sunu maibe too nia tempu mak bele sunu,” katak nia.
Nia hatete, dala barak labarik ho neebe foin fulan 9 no tinan 1 toba dukur, maibe derrepente rona fugetis nia lian tarutu halo sira hakfodak. Ida nee ladun diak ba sira nia saude, aleinde nee ba ema neebe loron ba servisu kalan atu deskansa la diak, tanba fugetis lian kintu kantu, tanba nee husu PNTL asegura para labele perturba ema nia deskansa.
Nunee mos Visi Direitór I Asosiasaun HAK, Antonino de Lima hatete, tuir nia hanoin primeiru liga ho utilizasaun fugetis, lo-loos nee iha lei. Regra lo-loos nee ba hirak neebe halo negosiu fugetes sira tenke kumpri, bainhira mak sira bele faan fugetes nee, iha tempu neebe autorizasaun tuir regra ka lei hatete.
“Tanba baibain fugetes balun kalan boot tiru, entaun ita bele dehan la diak. Tuir lo-loos nee ema sira tenke kumpriende oinsa moris iha sosiedade. Dala ruma ema koalia hela direitu, maibe tenke haree katak utilizasaun sira nee labele halo ema seluk nia direitu nee violadu, tanba nee husu ba hotu-hotu karik utiliza,” dehan Visi nee.
Tuir nia hanoin hanesan baibain, tanba nee ligadu ho interese ema barak nian neebe afeita ba ema barak ninia moris, entaun husu ba polísia atu kontinua halo kontrolu masimu ba ema sira neebe utiliza sasan nee la loos presiza halo atuasaun nunee bele redus, minimiza ka hapara aktu sira hanesan nee.
Nia husu seguransa tenke hola sira nia papel, tenke halo kontrolu ba foinsae sira neebe halo fugetes taturu nee laos iha fatin neebe apropriadu ka fatin nee merese tenke atuasaun.
(eme)
