DILI, STLTIMORLESTE.com – Estudante Nelia Bui de Araujo, ho idade 16, husi Eskola Sekundaria Jerál Fernando Lasama de Araujo Ainaro Vila, hetan oportunidade hodi asumi pozisaun nuudar Komandante Jeral Polísia Nasional Timor Leste (PNTL), Komisariu Jerál durante oras rua nia laran.
Oportunidade murak nee Nelia hetan nuudar parte ida promove feto iha kareira lideransa, nomos parte ida ba komemorasaun loron mundial ba labarik feto nian.
Estudante Nelia Bui de Araujo tenik, loron mundial labarik feto, nuudar loron globalmente hodi fo onra ba labarik feto, bele halo advokasia hodi muda sira nia kondisaun atu hetan oportunidade iha aprende, lidera no moris buras la ho diskriminasaun.
Nia espresa, sente onradu no orgulhu, tanba bele hetan oportunidade diak, tanba tur iha pozisaun meza Komandante Jeral PNTL nian.
“Hau fo agradese tebes ba Komandante Jeral, neebe fo ona oportunidade mai hau, hodi asume kargu ida durante oras 2 nian laran,” dehan Komandante Jeral PNTL Interinu, Nelia Bui de Araujo ba jornalista sira hafoin remata asume pozisaun iha Kuartel Jerál PNTL Caicoli, Kinta (09/10/2025).
Nia argumenta, durante ninia mehi hakarak duni sai nuudar ajente polisia, nunee bele sai nuudar servidor ba povu no nasaun.
“Ba oin hau nia esforsu mak estuda makaas, nunee bele atinji mehi neebe mak sai nuudar servidor ba povu no nasaun iha futuru,” esplika nia.
Iha fatin hanesan, Atual Komandante Jerál PNTL, Komisariu Polisia Henrique da Costa akresenta, programa nee komando realiza, tanba hetan pedidu husi Plan Internasional.
Nia esplika, pedidu husi Plan Internasional nee husu para atu promove labarik feto sira, no uza tempu durante oras 2 nia laran atu nunee estudante Nelia Bui de Araujo bele asume pozisaun nee.
“Programa ida nee, laos foin dahuluk halao ba PNTL, maibe ita akompana halao mos ba iha ministeriu seluk nomos ba iha F-FDTL ninian desde tinan hirak ba kotuk”, nia haktuir.
Komisariu nee konsidera, estudante Nelia asume posizaun nee, nuudar momentu oportunu, tanba PNTL halao hela prosesu rekrutamentu ninian, nunee nafatin enkoraja ba alin sira atu prepara-aan.
“Ita enkoraja ba alin feto sira atu labele tauk no labele sente lakoi atu sai polisia, tanba nee liu-hosi prosesu rekrutamentu nee,sira bele aplika no bele tuir prosesu sira tomak sai polisia”, nia koalia.
Tanba nee atu sai membru PNTL depende ba aan rasik, tanba nee alin Nelia Bui iha mehi atu sai polisia, mesmu agora nia sei eskola hela, mas espera mehi ida nee bele motiva nia para estuda didiak. Nunee futuru bele konkore ba vaga PNTL nian ruma bain-hira loke.
Entretantu Jestor Igualdade Jeneru Plan Internasional, Antoneta Maia katak, atividade nee parte ida husi programa Plan Internasional nian atu promove igualdade ba labarik feto, liu husi empodera sira nomos promove sira-nia ajensia nomos lideransa.
Nia afirma, babain Plan Internasional halao programa nee komesa 01 too 12 Outobru hodi selebra loron mundial ba labarik feto, tanba kada tinan labarik feto sira sempre asume pozisaun save, nunee sira bele aprende kada posizaun neebe mak sira asume konaba servisu.
“Ida nee ita agradese tebes, tanba ita hetan oportunidade atu alin feto nee asume kargu hanesan Komandante Jeral, entaun saida mak ita hakarak atu alin Nelia bele aprende servisu PNTL Jeral nomos toma desizaun politika sira, nomos servisu hanesan lideransa iha PNTL”, nia esplika.
Nunee posizaun neebe Nelia asume atu inspira mos labarik feto sira atu bele hola parte iha servisu seguransa sira, nomos iha mehi atu sai ajénte PNTL ho dalan nakloke.
Jornalista: Jeniche da Costa
Editora: Domingas Gomes
