DILI, STLTIMORLESTE.com – Polisia Nasional Timor Leste (PNTL) liu husi Departamentu Tranzitu Seguransa Rodoviaria Nasional (DTSRN), too munisipiu kontinua rejistu asidente 75, mate nain 4, kanek todan nain 9, nomos kanek kmaan nain 99.
Polisia Tranzitu no Seguransa Rodoviaria husi nasional too munisípiu, kontinua halo servisu makaas no halo fiskalizasaun ba movimentu transporte via publika.
“Asidente neebe ita rejista hamutuk 75, husi kazu hirak nee rezulta kanek kmaan 99, kanek todan 19, no mate hamutuk ema nain 4,” hatete Portavoz Komando PNTL, Superiendente Polisia João Belo dos Reis ba jornalista sira liu husi Konferensia Imprensa, Kinta (05/02/2026).
Nia dehan, husi fiskalizasaun mos polisia halo identifikasaun kondutor ou motorista sira neebe kontinua halo infrasaun ba kodigu estrada iha dalan publiku sira, nunee Polisia Tranzitu deteta infrasaun sira envolve tipu transporte hanesan kareta no motor husi instituisaun iha ida, transporte privadu iha 420, transporte publiku 34, nomos dokumentus neebe polisia prende 94.
Nia informa, tipu infrasaun sira neebe komete barak liu husi infrator mak hanesan wainhira kondus transporte iha estrada publiku mak la lori dokumentus 143, kontra orden autoridade 143, la uza kapasete 99, kontra sinais tranzitu 56, la uza asesores sira 26.
Iha fatin hanesan, Kondutor Justino Vilanova informa, Polisia Tranzitu prende nia motor tanba la lori dokumentus no too agora seidauk bele foti tanba dokumentus motor lakon.
“Hau nia motor Polisia Tranzitu Dili foti semana kotuk liu ba, hau seidauk foti tanba hau nia dokumentus lakon, tenki halo foun mak foin bele foti motor,” nia afirma.
(jen)
