BAUKAU, STLTIMORLESTE.com – Komando Polisia Nasional Timor Leste (PNTL) rekolha ona dadus membru hamutuk nain 5 iha Komando Polisia Munisipiu Baukau, neebe durante nee moras permanente.
Xefe Departamentu Pesoal, Superintendente Antonio da Luz esplika, rekolha dadus ba membru Polisia sira neebe hetan moras permanente nee akontese, tanba orienta husi Komadante Jeral PNTL ba ekipa Departamentu Pesoal servisu hamutuk ho Hospital Nasional Guido Valadares neebe delega espesialista nain 3 hamutuk ho ekipa Departamentu Pesoal kobre Komando Polisia Munisipiu sira iha territoriu nasional rekolha informasaun no hatene membru Polisia sira neebe hetan permanente.
“Horseik ami iha Komando Polisia Munisipiu Lautem nian doutor sira haree direitamente membru sira nia kondisaun saude i ohin ami iha Munisipiu Baukau depois haree sira nia kondisaun hotu ekipa sei halo relatoriu ba Komando Jeral,” Superintendente Antonio da Luz hateten ba jornalista sira hafoin rekolha informasaun husi membru Polisia neebe hetan moras permanente sira iha edifisiu Komando Polisia Munisipiu Baukau, Kuarta (14/01/2026).
Nia sublina, durante ekipa husi Departementu Pesoal hamutuk ho espesialista nain 3 rekolha informasaun husi membru Polisia iha Komando Polisia Munisipiu Baukau hamutuk nain 5 neebe durante nee afeta moras strok, matan no moras seluk tan.
Nia fundamenta, membru nain 5 refere infrenta moras balu atinji ona tinan 5, nunee liu husi rekolha informasaun sira sei relata ba Komando Jeral no kontinua ba Ministeriu Interior atu ajusta ba dadus liu husi relatoriu neebe antes nee iha hafoin prosesa.
“Ekipa sei halo relatoriu ba Komando Jeral kona-ba kondisaun membru sira nian atu nunee sira neebe tama ona iha lista reforma nian bele prosesu, tanba lista sira nee tama hotu ona, maibe sua exselensia Ministru haree katak tenke halo verifikasaun didiak para hatene sira nia kondisaun, tanba liu husi relatoriu deit sira moras maibe ita la hatene sira sei bele halo servisu ga lae, entaun ohin foti dadus sei konsulta mos,” Superintendente Antonio da Luz akresenta.
Xefe Departamentu Pesoal nee katak, aliende submete ba Ministeriu Interior Komando Jeral mos sei lori membru Polisia sira ba halo tratamentu ba moras neebe durante nee enfrenta.
Nia komenta, molok submete ba reforma Komando Jeral mos sei lori membru Polisia sira ba halo tratamentu ba moras neebe durante nee infrenta atu nunee membru sira bele konsentra ba sira nia moras no konsidera nafatin membru Polisia, maibe la hanesan ona, tanba prosesu sira ba salariu liu husi seguransa sosial tuir kontajen lei seguransa sosial nian.
(tom)
