DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodoviária Nasional (DTSRN) durante iha fulan Marsu rekolha reseitas ba kofre Estadu hamutuk US$ 73.648,00.
“Ami nia servisu iha munisípiu sira hotu inklui iha fronteira, ami iha reseitas ba kofre Estadu ho infrasaun total hamutuk US$73.648,00,” hatete Diretor Diresaun Tranzitu Seguransa Rodaviariu (DTSRN), Superintendente Asistente Polísia, Luis da Costa ba jornalista sira iha Komando Jeral PNTL, Kaikoli, Kinta (10/04/2025).
Nia dehan, husi orsamentu US$ 73.648.00 nee okupa primeira mak Komando PNTL Munisípiu Díli hatama US$ 23.433, segundu Komando PNTL Munisipiu Ermera hatama US$ 11.463,00, terseiru DTSR Nasionál hatama US$ 8.386,00, tuir fali mak Komando Munisípiu Manatuto hatama US$ 7.015,00 no ikus Komando PNTL Munisipiu Aileu hatama US$ 5.148,00.
Nia esplika, infrasaun neebe infratores sira komete barak liu mak kontra autoridade tranzitu 606, tuir fali la lori dokumentus orijinal infratores hamutuk 485 no tuir fali mak inspesaun liu prazu hamutuk 410, infratores la uza kapasete hamutuk 322, no ikus infratores nia karta kondusaun liu prazu hamutuk 202.
“Husi infrasaun sira nee mak ita konsege hatama reseitas ba kofre Estadu no iha fronteira mos ita konsege hatama ba kofre Estadu hamutuk US$ 20 mil no US$ 64 hahu husi Mota Ain, Batugede, Sakato no mos iha Mota masin Suai,” nia deklara.
Iha fatin ketak, Motorista Filipe Pereira informa, nia motor Polisia Tranzitu foti ba dala rua ona, no nia selu iha banku mos dala rua, tanba tula ema la uza kapasete.
“Hau nia motor nee Polísia Tranzitu foti dala rua ona, tanba hau lori alin ba eskola la uza kapasete, hau selu US$ 60 ba banku, hau atu dehan Servisu Tranzitu nee importante ba ita neebe lori karreta no motor,” nia afirma.
(jen)
