DILI,STLTIMORLESTE.com – Polisia Nasional Timor Leste (PNTL) liu husi Komando PNTL Munisipiu Dili hamutuk ho Unidade Espesial Polisia (UEP) sei garante segurasan masimu durante lutu semana ida ba Papa Francisco nia mate, atu nunee membru Governu hamutuk ho sarani sira bele halo adorasaun ba Papa nia mate ho diak no seguru.
Nia dehan, Komando PNTL Munisipiu Dili ho Batalhaun Orden Publiku sei garante segurasan masimu des lutu nasionál semana ida iha rezidensia Bispu sira nian no Lesidere, Altár Santu Tasi Tolu nomos Katedral Dili.
Nia dehan, bazeia ba regulasaun Governu kona-ba des lutu nasional durante semana ida ba Papa Francisco nia mate, tanba nee Komando Jeral PNTL hatún ona orden ba Komando Munisípiu Díli ho Unidade Espesial Polisia (UEP) hodi koloka membru sira atu asegura segurasa durante des lutu nasional nee.
Durante des luta nasionál nee, Polisia sei blokeia estrada Diresaun Palasiu Governu ba Largo Lesidere, hodi fo espasu ba alta integridade orgaun soberanu haat inklui sarani sira halo adorasaun.
“Hahu kedas iha ita nia Papa mate nee, ita blokeia kedas estrada sira neebe sarani sira halo adorasaun, la autoriza transporte publiku no privadu sira halo movimentu ba mai, nunee ita fo espasu ba ita membru Governu soberanu haat nomos sarani sira hodi mai halo adorasaun ba Papa Francisco nian mate,” hatete Komandante PNTL Munisípiu Dili, Superintendente Xefe Polísia Orlando Gomes ba jornalista sira iha nia knaar fatin Eskuadra Dom Aleixo Komoro, Tersa (23/04/2025).
Nia deklara, membru PNTL koloka ona ba fatin tolu mak hanesan Lesidere, fatin Altar Tasi Tolu nomos Katedral Vila Verde.
“Katedral ita fo seguransa no Polísia Tranzitu mo’s iha neeba atu nunee sarani sira halo misa iha neeba no apoiu mos husu UEP durante semana des lutu nian, nunee atividade sira lao diak,” nia informa.
Iha fatin ketak, Sarani David Ximenes deklara, Nasaun Timor Leste sente triste, tanba lakon Papa Francisco, tanba nee tenke halo adorasaun ba Papa.
“Ita sente triste tebes, tanba lakon Papa Francisco iha ita nia leet, nomos tristeza falun hela mundu tomak, tanba nee tenke halo adorasaun ba Papa Francisco no realidade ita haree Sarani hotu-hotu sempre sunu lilin iha fatin-fatin neebe Papa nia foto iha,” nia afirma.
(jen)
