DILI, STLTIMORLESTE.com – Polisia Nasional Timor Leste (PNTL) liu husi Komando Munisipiu Dili sei halo investigasaun neebe klean ba kazu konfrontu iha Tribunal Judisiariu Primeira Instansia Dili (TJPID), neebe rezulta husi suspeitu ba kazu nee hetan kanek grave too baixa iha Hospital Nasionál Guido Valadares (HNGV).
“Ita forma ona ekipa ida hodi halo investigasaun klean ba kazu konfrontu neebe akontese iha TJPID iha 28 Marsu foin lalais nee,” hatete Komandante Munisípiu Díli, Superintendente Xefe Polísia, Orlando Gomes ba jornalista sira iha Komando Munisipiu Dili, Sesta (04/04/2025).
Nia tenik, kazu nee akontese relasiona ho desizaun husi Tribunal Dili ba kazu matebian Zizelma Maria de Fatima Gonçalves neebe hamosu insatisfasaun husi familia sira, ikus mai hamosu konfrontu hodi rezulta sidadaun feto ida husi suspeitu ba kazu nee hetan kanek grave too baixa iha Hospital Nasionál Guido Valadares (HNGV).
Tanba foin daudaun nee akontesimentu ida iha Tribunal Dili, neebe rezulta suspeitu ninia feton ka bin hetan kanek grave.
“Iha momentu akontese ita nia alin feto nee hetan kanek grave husi parte ulun, ita lori duni bá iha HNGV hodi halo tratamentu,” nia informa.
Tuir informasaun neebe espalha membru Polisia sira daudaun nee fo hela seguransa ba iha vitima nee iha HNGV, tan nee nia rekonhese aloka duni membru polisia sira ba halo vizilansia ba vitima.
“Tanba ita haree ba situasaun no informasaun barak, ita nia polisia patrulhamentu eskuadra Kristu Rei nafatin halo vizilansia bá iha alin nee iha HNGV,” deklara nia.
Nia hatutan, parte Polísia Investigasaun sira daudaun nee hahu rekolha evidensia sira hanesan CCTV, loos duni tanba nee mak nia orienta ona Xefe Investigasaun Komando Munisipiu Dili forma ekipa ida atu haree kazu refere.
“Hau orienta ona Xefe Investigasaun Komando Munisipiu Dili forma ona ekipa ida atu haree ba kazu nee, prosesu lao hela, ekipa neebe mak atende ba prosesu nee lao hela, ita sei haree informasaun no evidensia balu, neebe prosesu nee lao hela,” nia koalia.
Husi akontesimentu nee, familia husi vitima mos hatoo ona keixa ba polisia no polisia kontinua halo prosesu investigasaun, nunee bele submete ba dalan legal.
“Sira hatoo keixa, ita aproxima ona ba kazu neebe mak akontese, ita hetan ona informasaun no keixa mos tama ona iha polisia, ita kontinua halo prosesu,” nia informa.
Bainhira vitima rekupera ka alta husi HNGV mak parte polisia investigasaun mos sei bolu vitima refere hodi fo mos informasaun ba iha polisia investigasaun.
Iha fatin ketak, Fontes Konfirmadu iha HNGV informa, sidadaun Timoroan feto ida mai iha sala emerjensia atende iha tiha, depois evakua kedas ba ICU tanba kanek grave iha parte ulun.
“Pasiente nee sei baixa hela no kondisaun diak oituan ona, maibe seidauk rekupera diak loos, tanba sei haruka baixa nafatin, hein rekupera mak foin ita fo alta, tanba nia mai ho kondisaun neebe grave tanba hetan pankada iha ulun,” nia afirma.
(ter)
