DILI, STLTIMORLESTE.com – Polisia Nasional Timor Leste (PNTL) sei kontinua buka tuir autor neebe mak naok motor hodi halo prosesu detensaun.
Lia hirak nee hatoo husi Komandante Jeral PNTL, Komisariu Jeral Polisia Henrique da Costa ba jornalista sira iha Komoro, Dili, Kuarta (06/11/2024).
Nia dehan, los duni horiseik lokraik komunidade intelejensia neebe mak kompostu husi Servisu Informasaun Polisia, Servisu Nasional Intelejensia no mos militar nian, sira asegura sidadaun balu neebe mak deskonfia envolve ka naok motor.
“Ida nee Servisu Informasaun Polisia nia no mos servisu investigasaun nian, atu bele buka tuir no identifika rede sira nee depois ita aprezenta para hodi implementa mandadu detensaun nian,” dehan nia.
Nia hatutan, kona-ba suspeitu sira neebe mak identifikadu ona nee iha faze prosesu nian, depois nia rezultadu sei fo sai. Kazu nee ita seidauk detein, tanba kazu nee ita bolu halo identifikasaun uluk depois sei aprezenta ba Ministeriu Publiku hodi husu nia mandadu bainhira mak prosesu kontinuasaun,” dehan nia.
(mar)
