DILI, STLTIMORLESTE.com – Komando Polisia Nasional Timor Leste (PNTL) sei la tolera kualkér sidadaun neebe halo asaun negativu durante jogu CPLP iha Timor Leste (TL).
Nia dehan, tanba nee Unidade Espesiál Polísia (UEP), Komando Jeral, Komando Munisipiu Dili no mos Diresaun Tranzitu Seguransa Rodaviariu mai iha Estadiu Munisipal Dili atu fo konhesimentu ba area servisu atu fo seguransa ba VIP no adeptus sira ba jogu CPLP.
“Ohin ami mai iha nee atu fo konhesimentu ba deskrisaun servisu liu-liu ba servisu operasionál nian, tanba PNTL liu husi UEP, Komando Jeral, Komando Munisipiu Dili no Diresaun Tranzitu nian atu fo seguransa masimu ba eventu jogu CPLP ida nee,” hatete Komandante Operasaun PNTL, Superintendente Xefe Polísia, Justino Menezes ba jornalista sira iha Estadiu Munisípal Dili, Kinta nee (17/07/2025).
Nia tenik, PNTL sei fo seguransa ba Jogu CPLP ho metodu tolu, metodu primeiru seguransa mais proximu, segundu seguransa proximu no terseiru mak Seguransa forsada.
Tanba nee mak autoridade seguransa husu ba adeptus sira bainhira tama estadiu, karik tama ho disiplina no tuir regras neebe komisaun prepara ona, maske tama ho gratuita, maibé bainhira ita nia tribun nakonu ona ita labele obriga atu tama, nee autoridade seguransa sei la fo fatin ona.
“PNTL sei fo seguransa masimu ba delegasaun nasaun CPLP neebe sei tuir kompetisaun internasionál ida nee ho diak too remata.
“Ami garantia atu fo seguransa masimu ba jogu CPLP, se bainhira grupu ou ema individu balu hakarak atu halo asaun negativu hodi hafoer imajen Timor Leste nia naran, ami sei la tolera kualkér se deit,” nia informa.
Nia deklara, PNTL iha linha koordenasaun ho Forsa Defeza Timor Leste (F-FDTL), bainhira situasaun ruma la permite mak Forsa Amiga F-FDTL sei reforsa PNTL hodi halo atuasaun ba kriminozu sira neebe tenta atu halo asaun tanba PNTL ho F-FDTL iha operasaun periodiku 24 oras nia laran.
“Ami husu ba sidadaun Timoroan sira hotu, hakarak atu mai partisipa jogu CPLP nee mai ho disiplina tuir regras neebe Komisaun CPLP no Autoridade seguransa PNTL tau ona, no lao tuir ida nee, atu nunee buat hotu bele lao diak,” nia informa.
Observasaun STL nian iha terenu katak, iha Segundu Komandante Jerál PNTL Komisariu Polísia Pedro Belo no Komandante Komandante Komando Operasaun Nasional Superintendente Xefe Polísia, Justinho Menezes inklui Komandante Komando UEP Superintendente Polísia Damião Correia hamutuk ho ekipa Komisaun Organizadora ba Jogu Desportu CPLP epoka 2025 akompanha husi Ministru Juventude, Desportu, Arte no Kultura Nélio Isac Sarmento halao inspesaun ikus ba preparasaun Jogu CPLP iha Stadiun Munisipal Dili.
Entretantu, iha inspesaun nee Segundu Komandante Jerál PNTL nee halao mos brifing ba membru PNTL sira neebe mak sei halo seguransa iha areadores estadiu nian durante Jogu nee lao, nomos membru PNTL neebe mak sei halo Seguransa ba Jogu CPLP nee kompostu husi Komando Munisipiu Dili, Kuartel Jerál, Komando Unidade tolu (UPM, UEP no UPF) inklui Centro Formação Polícia (CFP).
(jen)
