DILI, STLTIMORLESTE.com – Polisia Nasional Timor Leste ( PNTL) komemora nia aniversariu ba dala 25, iha loron 27 Fevereiru tinan nee, maibe sei menus infraestrutura liu-liu edifisiu propriu ba Komando Munisipiu sira.
“Iha aniversariu ba dala 25 ezistensia PNTL, hetan dezafiu husi infraestrutura Instutisaun PNTL nian liu-liu ekipamentu nomos menus rekursu umanu,” hatete Komandante Jerál Polisia Nasional Timor Leste (PNTL), Komisariu Jerál Polisia, Henrique da Costa ba jornalista sira iha Komando Jeral, Kailoli, Tersa (04/2/2025).
Komisariu dehan, Instutisaun PNTL hamriik nuudar mane klosan ida ona, maske nunee sei falta ekipamentu nomos rekursu umanu.
“Ita nia infraestrutura husi Instituisaun PNTL nian, liu-liu ita nia Kuartel Jeneral PNTL hahu husi inisiu PNTL hamriik too ohin loron seidauk iha Komando Jeral neebe diak nomos Komando Munisípiu sira nia fatin neebe dignu ba ita nia membru sira atu halao nia knaar mos seidauk, nomos eskuadra sira mos seidauk inklui Postu Fronteira sira nian,” nia tenik.
Nia esplika, maske komando koloka ona membru Ofisial Polisia Suku (OPS) maibe seidauk iha fatin diak atu membru sira utiliza hodi halao sira nia knaar, tanba nee mak OPS nia servisu iha suku sira seidauk masimu.
Maibe PNTL mos menus fasilidade servisu hanesan transporte, tanba servisu PNTL sempre utiliza transporte atu halo atendimentu ba publiku, nunee presiza transporte neebe diak atu servisu nomos transporte ba iha operasaun iha munisípiu sira mos menus tebes sai hanesan dezafiu boot ba PNTL atu halao servisu.
Iha fatin ketak, Komandante PNTL Munisípiu Dili, Superintendente Xefe Polísia, Orlando Gomes espika, liga ba aniversáriu PNTL ba dala 25, durante nee Komando PNTL Munisipiu Dili sempre hasoru dezafiu oin-oin, maske fasilidade no transporte iha ona, maibe dezenvolvimentu i instituisaun ba oin nee sempre hasoru nafatin dezafiu, maibe dezafiu hirak nee laos obstaklu, maibe polisia nee kontinua servisu nafatin.
“Hahu ba oin ita haree progresu diak, iha progresu servisu, ita mos simu fasilidade no aumenta ba beibeik, agora ita mos simu ekipamentus no neineik sei kompleta, atu nunee ita bele halao servisu ho profisional diak liu tan,” dehan nia.
Nunee mos Akademista Universidade Nasional Timor Lorosae (UNTL) Fakuldade Direitu, Deolindo José Manuel Silva esplika, Polisia Nasional Timor Leste (PNTL) nia knaar nee importante tebes ba nasaun no ba povu, tanba nee ekipamentu tenke kompletu ba sira, atu nunee sira utiliza hodi halao sira nia servisu.
(jen)
