DILI, STLTIMORLESTE.com – Xefe Departamentu Investigasaun Kriminal (DIK), Superintendente Xefe Polísia João Belo dos Reis hatete, DIK konklui ona investigasaun ba sidadaun nain lima (5) neebe suspeita Padre ”falsu” viral iha facebook foin lalais nee.
Nia dehan, DIK submete ona auto notisia prosesu nee ba iha Ministeriu Publiku.
“Komandante Jeral koalia tiha ona kona-ba oinsa mak Polisia halo investigasaun. Agora hau aprezenta deit ba maluk sira katak servisu investigasaun kriminal elebora ona nia relatoriu ba sidadaun nain 5 nee horiseik ami halo indentifikasaun nee, ami foti ona sira nia deklarasaun hotu. Ami elabora ona sira nia deklarasaun, tanba nee atu dehan deit katak, ami halo identifikasaun ba ema nain 5, ami konklui ona prosesu ida nee no aprezenta ona auto notisia ba Ministeriu Publiku hodi prosesu ba oin,” hatete Superintendente Xefe Polísia, João Belo ba jornalista sira, iha Sentru Formasaun Polísia, Komoro, Dili, Kuarta (27/11/2024).
Nia dehan, agora daudaun Departamentu Investigasaun Kriminal seidauk bele promunsia buat ruma ba sidadaun nain 5 nee, tanba ida nee hola parte iha segredu justisa.
Hafoin Departamentu Investigasaun Kriminal halo tiha identifikasaun ba sidadaun nain 5 nee, DIK la detein sira no husik sira fila fali ba idak-idak nia uma.
Iha fatin ketak, Akademista UNTL, Jose Luis do Carmo hatete, Polisia tenke halo investiga klean ba padre falsu neebe lori Amu Bispu nia naran no lori mos Igreja Katolika nia naran nee labele, tenke prosesu ba oin.
(jen)
