DILI, STLTIMORLESTE.com – Xefe Suku Kulun-Hun, Deus Dado Martins hatete, durante nee knaar Konselhu Polísiamentu Komunitariu (KPK) lao hela, tanba nee husu Instutisaun Polísia Nasionál Timor Leste (PNTL) tenke valoriza servisu KPK liu husi finanseiru, labele voluntáriu deit.
Nia dehan, membru KPK hirak nee mesak iha feen ho oan, maibe sira servisu voluntáriu deit no ida nee mos halo sira la halao sira nian knaar prevensaun konflitu ho diak.
Nia tenik, durante nee KPK halao nia knaar hodi fo apoiu ba autoridade lokal hodi fo segurasan masimu ba komunidade, nunee mos kria pas no estabilidade iha komunidade nia leet.
“Ita husu ba Instituisaun Polísia Nasionál Timor Leste atu valoriza KPK nia servisu liu husi finanseriu, labele voluntariu deit,” hatete Xefe Suku Kulun-Hun Deus Dado Martins ba Jornalista sira iha Sede Suku Kulun-Hun loron kinta (07/08/2025).
Nia informa, atu nunee sira bele iha vontade servisu neebe diak hodi kuntribui ba kria pas no estabilidade iha rai laran.
“KPK hirak nee iha família presiza finanseiru ruma atu bele sustenta sira nia família,” nia tenik.
Aleinde nee nia dehan, liga ba kazu konfrontasaun foin lalais akontese iha Kulun-Hun nee laiha partisipasaun husi KPK tanba bainhira autoridade lokal sira ba bolun sira ho razaun dehan sira presiza halo buat seluk neebe hodi hetan osan hodi sustenta família.
Iha fatin ketak, Komandante Jeral PNTL Komisáriu Polisia Henrique da Costa informa, liga ba rekomendasaun husi autoridade lokál sira kona-ba vensimentu ba KPK simu ona rekomendasaun.
“Atu dehan deit katak iha Komando PNTL laiha kbiit hodi fo vensimentu ba KPK sira neebe mak durante nee apoiu servisu Polísia hodi halo prevensaun konflitu iha suku,” nia deklara.
Nia informa, maibe Ministériu Interior (MI) no Ministériu Administrasaun Estatal (MAE) hala’o ona enkontru ho PNTL oinsa atu rezolve vensimentu ba KPK.
“Liu husi enkontru neebe iha hodi kria lei oinsa atu bele solusiona vensimentu ba KPK,” nia esplika.
Enkuantu nia dehan, husi Komando rasik laiha kbiit atu fo vensimentu ba sira, maibe kona-ba kapasitasaun no ekipamentu Komando fasilita.
(jen)
