DILI, STLTIMORLESTE.com – Komando Polisia Nasionál Timor Leste (PNTL) liu husi Diresaun Servisu Investigasaun Kriminál (DSIK) halo treinamentu ba membru investigador iha Departamentu Apoiu Pesoal Vulneravel halo protesaun ba ema ho defisiensia no membru LGBTIQ+ neebe hetan violensia diskriminasaun iha Timor Leste (TL).
Nia dehan, iha treinamentu ida nee importante fo enfaze tulun membru PNTL sira kompriende no responde halo atendimentu ba kazu Seksual Orientation, Gender Identity, Gender Expression, and Sex Characteristics (SOGIE-SC) bainhira akontese.
“Treinamentu ida nee mak evidensia klaru katak, ita hanesan instituisaun seguransa mak iha dever no obrigasaun tuir konstituisaun haruka atu fo protesaun direitu umanu, dignidade ema hotu, inklui ema neebe halao moris sira ho diferensa sira iha orientasaun seksual, identidade no ekspresaun jeneru,” hatete Diretor Diresaun Servisu Investigasaun Kriminál (DSIK), Superintendente Polisia João Belo dos Reis ba jornalista sira liu husi nia diskursu iha salaun Alfela Vila Verde, Kinta (12/06/2025).
Nia tenik, treinamentu ida neebe organıza husi ALFELA Timor Leste no partner internasional sira hanesan Plan International, hetan valor importante tebes iha esforsu kolektivu atu hadia koñesimentu no kapasidade membro PNTL, liu-liu iha Seksaun Apoiu ba Ema Vulnerável.
“Ita kompriende katak, ema ho identidades no ekspresaun jeneru ne’ebé la komun muitas vezes enfrenta diskriminasaun, estigma no violensia. Entaun iha konteksu nee, PNTL tenke iha papel importante atu garante katak proteksaun lei no direitu sira laos atu aplika ba grupu partikular deit, maibe ba ema hotu-hotu hanesan,” nia esplika.
Tanba treinamentu ida nee sei fo oportunidade ba ita atu kompriende prinsipiu direitus umanus nian iha relasaun ho SOGIE-SC, aprende konaba abordajen sensível no profisionál iha interasaun ho komunidade LGBTQI+, halo prátika refleksivu kona-ba bias ka prejuisu sira neebe bele afeta dezenvolvimentu profisional no integridade institusional,” nia informa.
Nia deklara, fundamenta ezisténsia kursu nee mos hamutuk ho objetivu estratejiku PNTL atu hadia servisu ba publiku, reforsa konfiansa komunidade no aumenta profisionalizmu iha fornese seguransa no justisa ba ema vulneravel.
“Ita bele dehan katak treinamentu ida nee laos deit momentu atu aprende, maibe mos oportunidade atu transforma atitude, mentalidade no reforsa empatia. Hau hakarak fo agradesimento boot ba Alfela Timor Leste ba lideransa iha organizasaun treinamentu ida ne’e organizasaun naun Governamental no Parseiru internasional kontinua halo promosaun direitus umanus iha Timor Leste. Ita hamutuk sei kontinua hadia kapasidade no estratejia atu hadomi no proteje ema hotu-hotu, iha rai ida neebe livre husi diskriminasaun no violensia katak, seguransa ka justisa deit la iha valór se la inkluzivu ba ema hotu iha Timor Leste,” nia koalia.
Entretantu Treinamentu nee sei halao durante loron rua, pastisipa mai husi membru PNTL-VPU nain 27 husi Munisipiu Ainaro, Aileu no Dili neebe lidera husi Xefe Departamentu Apoiu Pesoal Vulneravel Inspetor Xefe Ricardo da Costa hamutuk ho parseiru sira hanesan ALFELA Timor Leste, Plan Internasional, JSMP, Organizasaun Naun Governamental hanesan RHTO, Kodiva no sira selu iha Timor Leste.
(jen)
