DILI, STLTIMORLESTE.com – Polisia Nasional Timor Leste (PNTL) liu husi Servisu Sekreta identifika ona autor nain haat (4) neebe deskonfia involve iha kazu abuzu seksual hasoru vitima inisial FCL (16) neebe kategoria minoridade.
Tuir informasaun neebe STL asesu husi autoridade seguransa katak, hafoin polisia simu keixa no hetan faktus ho evidensia husi vitima, ekipa servisu halo kedas koordenasaun ho ekipa sub seksaun Vulneravle Person Unit (VPU) Munisipiu Dili, iha loron sesta feira, oras 14:00 OTL, 16 Janeiru 2026.
Iha intervensaun nee parte investigador VPU kontaktu kedas ba vitima FCL nomos sasin TBCX (16) mai iha fatin VPU hodi presta deklarasaun no buka tuir suspeitu sira nee no ikus mai konsege asegura adolesente mane nain 4 iha sira nia hela fatin.
“Iha prosesu kapturasaun nee ekipa servisu halo esplikasaun neebe konvensidu ba familia suspeitu sira atu koopera ho diak hodi la mosu dezentendimentu entre familia ho autoridade seguransa, tanba kazu nee envolve labarik sira maioria estudante deit,” sita komunikadu nee.
Enkuantu suspeitu hirak nee mak hanesan CON alias A (19), JMPA alias M (18), JGFPS alias F (17), GAP alias A (19), JPR alias G (18), suspeitu refere ba eskola ona iha Indonezia.
Hafoin asegura suspeitu nain 4, ekipa servisu transporta no entrega kedas suspeitu sira ba iha VPU tutela Servisu Investigasaun Kriminal (SIK) Munisípiu Dili, hodi halo prosesu investigasaun nunee bele hatene motivu husi akontesimentu nee.
(alb)
