BAUKAU, STLTIMORLESTE.com – Komando Polisia Nasional Timor Leste (PNTL) Munisipiu Baukau identifika ona inan soe bebe iha area Daeisi, Aldeia Caeasamutu, Suku Buruma, Postu Administrativu Baukau Vila.
Komandante Interinu Komando Polisia Munisipiu Baukau, Superintendente João Sancho Pires esplika, kazu soe bebe mane iha Buruma akontese iha loron 28 Abril 2025, maibe liu loron rua parte polisia konsege detekta, tanba liu husi kooperasaun servisu entre Autoridade Suku Buruma no Kaibada Makasae.
“Ita buka too ikus ema sira informa ba Komandante Eskuadra katak ema nee Kaibada Makasae nian, hela fatin Buile Borubaha,” informa João Sancho Pires ba jornalista sira iha Vila Nova, Baukau, Segunda nee (05/05/2025).
Nia sublina, hafoin Komando Polisia Munisipiu Baukau liu husi Polisia Eskuadra Postu Baukau Vila simu informasaun husi entidades sira, orienta kedas Servisu Investigasaun Kriminal (SIK) foti inan ba bebe iha nia rezidensia no koordena kedas VPU no Pradet hodi kontinua evakua inan soe bebe ba Hospital Rejional Eduardo Ximenes Baukau halo tratamentu.
Maibe hafoin remata tratamentu kontinua kedas asegura iha Uma Mahon hodi kontinua prosesu, tanba liu husi investigasaun dahuluk seidauk klean.
“Soe bebe tanba inan bebe nee dehan katak mane sira nain rua tuir malu nee mak laiha responsabilidade, neebe ita sei tenta halo klean investigasaun para haree asunu nee,” João Sancho Pires akresenta.
Komandante Interinu nee haktuir, investigasaun dahuluk ba inan soe bebe seidauk temi aman ba bebe refere, maibe inan soe bebe promote sei temi iha faze investigasaun daruak.
Mezmu inan soe bebe refere seidauk temi aman ba bebe, maibe Komando Polisia liu husi Servisu Investigasaun Kriminal rejistu ona iha Ministeiru Publiku ho nuc. 0064/2025 hodi prosesa.
“Soe bebe kontra hela lei sita iha espozisaun ka abandona nee mak kondena nia atu lao,” katak João Sancho Pires.
Entretantu bebe refere soe iha loron 28 Abril 2025, tuku 03:00 madrugada OTL, neebe soe iha uma komunidade Benedita Maria da Silva nia odamatan oin, rezidensia Dae-Isi Buruma husi inan inisial A.L.X, idade 19.
(tom)
