BAUKAU, STLTIMORLESTE.com – Komando Polisia Munisipiu Baukau kaptura sidadaun Indonezia ida iha merkadu tuan Vila Nova Baukau, tanba utiliza viza turista halo fali negosiu iha merkadu Baukau.
Deklarasaun nee hatoo husi Komadante Komando Polisia Munisipiu Baukau, Superintendente Xefe Polisia, Antonio Maria de Sa ba jornalista sira iha Vila Nova, Baukau, Kinta (21/11/2024).
“Kazu ida husi sidadaun Indonezia nee ita kaer envolve iha atividade kontra bandu, nia problema mak utiliza sala viza halo fali negosiu,” dehan Superintendente Xefe Polisia, Antonio.
Sidadaun nee tuir Antonio, nia identidade Mane idade 54 husi Rote NTT-Indonezia neebe iha tinan hirak liu ba tama iha Timor ho viza turista halo fali negosiu faan roupa iha merkadu Vila Nova, maibe liu husi ekipa konsege detekta no kaptura kedas iha fatin negosiu iha loron 20 Novembru 2024 pur-volta tuku 14:00, tanba kontra lei imigrasaun.
Hafoin ekipa detekta, Komando Polisia Munisipiu Baukau liu husi Seksaun Investigasaun Kriminal too kedas fatin negosiu hodi rekolha no investiga sidadaun estranjeiru refere, tanba kontra lei, nunee ekipa evakua kedas sidadaun refere ho nia evidensia sira asegura kedas oha edifisiu Komando Munisipal, maibe iha loron 21 Novembru 2024 ohin, entrega ona ba parte imigrasaun hodi prosesu tuir Lei neebe vigora iha Timor-Leste.
Komandante nee argumenta, relasiona kaptura sidadaun Indonezia refere, parte Autoridade Seguransa mos deskonfia sei iha sidadaun estranjeiru balun neebe utiliza viza turista halo atividade negosiu no seluk tan iha Baukau. Tanba nee, parte Autoridade Seguransa kontinua kordena ho entidades hotu iha Munisipiu Baukau hodi halo identifikasaun ba sidadaun estranjeiru sira hodi prosesu tuir Lei.
Nunee husu komunidade hotu iha Munisipiu Baukau atu kopera ho parte seguransa, bainhira detekta sidadaun estranjeiru halo atividade negosiu iha area juridiku Baukau, hatoo informasaun ba parte seguransa hodi halo investigasaun, nunee detekta sidadaun estranjeiru uza sala viza, tenke prosesu hodi deporta hikas ba nia nasaun origen.
(EST 2)
