BAUKAU, STLTIMORLESTE.com – Komando Polisia Munisipiu Baukau monta ona estratejia hodi asegura seguransa iha loron finadu.
Komadante Komando Polisia Munisipiu Baukau, Superintendente João Sancho Pires informa, bazeia ba despaisu husi Komando Jeral ba Komando Polisia Munisipiu sira mak Komando Polisia Baukau realiza ona enkontru ho Xefe Seksaun no Komadante Polisia Eskuadra sira iha Munisipiu Baukau atu prepara planu ba seguransa hahu husi loron 01-02 Novembru tinan nee, tanba loron finadu importante ba komunidade Timor oan atu selebra neebe hahu ona halo movimentu husi kapital ba Munisipiu no husi Munisipiu ba Suku.
“Ita planu tiha ona planu operasaun ba eventu rua nee, planu operasaun ita koloka ona membru ba igreja sira neebe iha ita mos koloka membru ba semiteriu sira iha Baukau laran tomak,” João Sancho Pires hateten ba jornalista sira iha, Vila Nova, Baukau, Kuarta (29/10/2025).
Nia sublina, razaun Komando estabelese membru sira iha semiteriu publiku sira iha Baukau, tanba deskonfia iha semiteriu balu risku ba perturbasaun nunee Komando destaka membru sira hodi fo seguransa iha semiteriu sira hodi garante situasaun hakmatek tuir orariu tau aifuan hahu husi tuku 06:00 dader too tuku 18:00 loraik Oras Timor Leste.
Nia fundamenta, antes too loron 01-02 Novembru nee Komando orienta ona membru sira halo patrolhamentu rutina loron no kalan hodi limita jovem sira hemu tua iha estrada ninin no tuur iha estrada publiku liu tuku 22:00 kalan.
“Ita iha lei se deit mak kontra perturbasaun ordem publika iha kodigu prosesu penal 244 ita foti prosesu tuir lei, ema hotu-hotu iha lei nia okos,” João Sancho Pires akresenta.
Komadante nee informa, aliende halo patrolhamentu Komando mos planu halo auto stop iha estrada publiku sira iha Munisipiu Baukau hodi evita sasan kroat no seluk tan.
“Chek Point Swipng ita halo hela ba sasan kroat ba motor la uza atributu, hanesan sapa matrikula, la uza kapaseti dokumentus laiha ita kobre tuir lei tranzitu nian neebe iha, se mak uza kanu resin ita foti,” João Sancho Pires relata.
Komadante Komando Polisia Munisipiu Baukau nee husu entidades hotu iha Baukau atu asegura pas no estabilidade iha ambitu finadu nee nunee ema hotu sente livre no hakmatek, kari aifunan iha semiteriu sira, aleinde mos Komando bandu sidadaun sira hemu tua iha semiteriu, maibe hemu tua iha uma no bainhira mosu problema informa lalais ba parte seguransa hodi neutraliza sitausaun.
Jornalista: Tomas Reis
Editora: Carme Ximenes
