BAUKAU, STLTIMORLESTE.com – Komando Polisia Munisipiu Baukau planeia sei hasai karta sirkular atu regula sidadaun sira neebe tula animal sira husi fatin ida ba fatin seluk, tenke hetan karta lisensa.
Relasiona animal hanesan kuda no karau neebe foin lalais lakon iha Suku Umanaulo, Postu Administrativu Venilale, Munisipiu Baukau, Komando Polisia Munisipiu Baukau, Superintendente João Sancho Pires hateten, kona-ba kazu refere parte Komando Polisia Baukau simu ona informasaun no oriente ona Komadante Eskuadra Postu Venilale atu halo koordenasaun ho Autoridade Suku Umanaulo hodi kria mekanizmu evita kazu refere.
Aleinde nee mos Komando Polisia sei aumenta volume patrolhu iha Munisipiu Baukau no hasai karta sirkular hodi regula sidadaun sira neebe tula animal sira husi fatin ida ba fatin seluk tenke hetan karta lisensa husi autoridade relevante.
“Ita sei hasai sirkular ruma ba Baukau deit, hanesan animal bibi kuda karau fatin ida ba fatin seluk tenke iha lisensa ruma nunee ita evita, nunee tempu besik ita sei realiza akordu ida nee,” hateten João Sancho Pires ba jornalista sira iha knaar fatin Vila Nova Baukau, Kinta (31/07/2025).
Nia esplika, karta sirkular refere sei halo akordu mos ho Autoridade Suku no parte Florestal Baukau, nunee sidadaun sira neebe tula animal sira husi fatin ida ba fatin seluk tenke hetan lisensa husi Autoridade Suku sira, Polisia Eskuadra Postu sira inklui parte Florestal.
Nia sublina, planu refere atu evita naok animal iha Munisipiu Baukau no hatene pardeiru animal ida ba iha fatin ida.
Enkuantu kazu naok animal iha Suku Umanaulo foin lalais nee, Komando Polisia Munisipiu Baukau kontinua buka tuir autor sira hodi submete ba prosesu investigasaun.
Tanba nee husu entidades sira hotu atu ajuda servisu seguransa, karik konhese autor sira no hetan autor sira nia paradeiru informa ba polisia hodi halo kapturasaun.
(tom)
