BAUKAU, STLTIMORLESTE.com – Komando Polisia Munisipiu Baukau liu husi Servisu Investigasaun Kriminal (SIK) rejistu ona kazu agresaun fiziku hasoru Padre Parokia Santa Terezinha Kelikai, David Savio, SDB iha Ministeriu Publiku (MP).
Komandante Interinu Komando Polisia Munisipiu Baukau, Superintendente João Sancho Pires esplika, kazu agresaun fiziku halo husi suspeitu SDC, tinan 34, hasoru Padre Parokia Santa Terezinha Kelikai, David Savio, SBD rezulta Padre Parokia kamiza (faru hatais) nakles no hetan kanek natoon iha parte kakorok neebe deskonfia kona husi liman kukun.
Motivu ba agresaun fiziku nee, tanba suspeitu SDC objetivu atu trata dokumentu hanesan sertidaun batizmu oan nian iha Parokia Santa Terezinha Kelikai, maibe pesoal kartoriu responsavel ba labra livru asentu kondisaun moras, nunee suspeitu hirus hodi halo asaun.
Hafoin insidente nee akontese, parte Komando Polisia Munisipiu Baukau liu husi Polisia Eskuadra Postu Kelikai too kedas fatin akontesimentu hodi evakua suspeitu SDC detein iha sela Komando Polisia Munisipiu Baukau.
“Uza liman lees Amu nia faru, agresaun fiziku, hakarak ga lakohi kazu nee tenke ba oin, ita orienta investigasaun prosesu ba MP,” hateten João Sancho Pires ba jornalista sira iha Vila Nova Baukau, Tersa (13/05/2025).
Komandante Interinu nee sublina, kazu refere Servisu Investigasaun Kriminal rejista ona iha Ministeriu Publiku ho Nuc. 0015/25.BCQLC kontinua prosesu ba oin hodi fo solusaun.
João Sancho Pires katak, mezmu vitima Padre Parokia Santa Terezinha Kelikai David Savio SDB ho vitima perdua malu ona hafoin akontese, maibe kazu kontinua ba oin, tanba ekipa pastoral la konkorda asaun refere.
“Pastoral fo hatene Amu hakarak ga lakohi kazu nee ba oin, tanba Amu kaer hela Konselhu Pastoral Kelikai, maibe depende ba Tribunal mak haree asuntu nee,” João Sancho Pires haktuir.
Komandante Interinu nee akresenta, Komando Polisia Munisipiu Baukau ezekuta ordem servisu hodi garante pas no estabilidade, maibe prosesu hotu sei termina iha Tribunal.
Tuir observasaun STL nian iha terenu nota katak, suspeitu SDC daudaun Komando Polisia Munisipiu Baukau kontinua asegura iha sela.
(tom)
