BAUKAU, STLTIMORLESTE.com – Komadante Komando Polisia Munisipiu Baukau, Superintendente Xefe Polisia Antonio Maria de Sa relata seguransa durante selebrasaun loron natal no tinan foun ba Bispu Diozese Baukau, Dom Leandro Maria Alves.
“Ohin hau mai atualiza situasaun seguransa iha Baukau ba Amu Bispu hanesan boot iha Diozese Baukau nian, horiseik ita nia forsa 2 kontinua junta nafatin halo konsolidasaun asegura festeza natal no tinan foun,” hatete de Sa hafoin hasoru malu ho Bispu Dioseze Baukau iha Vila Antiga, Tersa (24/12/2024).
Liu husi relata situasaun seguransa Polisia durante selebrasaun loron natal no tinan foun ba Bispu Dioseze Baukau mak evita sidadaun sira hemu lanu iha estrada no prezepiu, sunu fugetis arbiru iha kada bairu, no halo auto stop ba transporte publiku no privadu sira, tanba ekipa hahu ona halo patrolhu iha area juridiku Baukau nian.
Patrulha refere sei la tolera sidadaun sira hemu lanu iha estrada publiku, tanba bele hamosu problema no sei la tolera sidadaun sira hemu lanu iha fatin prezepiu, tanba fatin prezepiu fatin ba adora Kosok Oan, laos fatin hemu lanu.
Nunee mos liu husi ekipa seksaun tranzitu sei halo auto stop ba transporte publiku no privadu sira hodi reduz kazu asidente sira.
Aleinde mos ekipa sei la tolera sidadaun sira neebe tenta sunu fugetis arbiru iha nivel bairu la tuir tempu, tanba fo impaktu ba ema seluk nia deskansa, maibe fo autorizasaun hodi sunu iha kalan natal, bainhira selebrasaun misa remata hodi fo onra ba Kosok Oan nia moris.
Enkuantu Bispu Diozese Baukau, Dom Leandro Maria Alves apresia ho planu seguransa ba asegura selebrasaun loron natal no tinan iha Munisipiu Baukau.
“Ita nia Komadante mai iha nee atualiza situsaun iha ita nia rai Baukau nee kontroladu, nee grasa ba ita nia maturidade sarani sira nia konsiente ba loron ida nee,” hatete Dom Leandro.
Bispu Dioseze Baukau nee husu ba sarani sira koopera nafatin parte seguransa kria pas no estabilidade iha Baukau, tanba durante patrolhu seguransa nian ba loron importante refere laos laos lei no odem, maibe nee ho domin atu eduka komunidade sira atu hakmatek.
Enkuantu operasaun konjuntu husi Komando Polisia Munisipiu Baukau, kompostu husi membru Polisia, BOP, F-FDTL no Polisia Militar neebe halo patrolhamentu rutina iha area juridiku Baukau nian, neebe hahu ona iha loron 23 Dezembru.
(EST 2)
