BAUKAU, STLTIMORLESTE.com – Komando Polisia Munisipiu Baukau sei intensiva pasa revista ba transporte publiku no privadu inklui patrulha rutina iha area juridiku Baukau.
Komadante Interinu Komando Polisia Munisipiu Baukau, Superintendente João Sancho Pires esplika, iha fulan Fevereiru 2025 Komando Polisia Munisipiu liu husi Seksaun Tranzitu destaka membru sira iha estrada publiku hodi kontrolu movimentu rodaviariu iha estrada publiku Baukau nian, liu-liu iha Vila Antiga no Vila Nova hodi netraliza engarrafamentu, nunee iha fulan nee Komando Polisia Munisipal kontinua orienta parte seksaun hotu atu intensiva liu tan no aumenta patrulha iha area juridiku Baukau.
“Ita orienta tan sira atu bele intensiva aumenta tan patrulhamentu iha area Baukau nian iha Eskuadra sira atu ba kalan no loron nian nomos orienta ba Tranzitu atu bele halao hela sweeping cek poin iha kada Eskuadra,” hatete Komandante nee ba jornalista sira iha Vila Nova, Segunda (10/03/2025).
João sublina, kona-ba sweeping Komando Polisia Munisipiu Baukau fo ona orientasaun ba Komadante Eskuadra hotu atu realiza atividade hanesan, nunee bele eduka motorista sira utiliza transporte publiku tantu privadu tenke iha dokumentus neebe validu.
Tanba lei kodigu estrada deklara klaru ona katak, motorista neebe utiliza motor no karreta tenke iha karta konduzaun validu, transporte tenke iha asesoria kompletu, tanba bainhira laiha Karta kondusaun no kontra asesoria, mak parte Tranzitu hetan sei hetan sansaun tuir lei kondigu estrada nian neebe estabelese ona.
No iha fulan Fevereiru nee mos Komando Polisia Baukau rejistu kazu hamutuk 21, kompostu Ofensa Integridade no Violensia Domestika neebe konsege rejistu ona iha Ministeriu Publiku hodi kontinua prosesu ba oin.
(EST 1)
