BAUKAU, STLTIMORLESTE.com – Autoridade Postu Administrativu Venilale husu Polisia Komando Polisia Munisipiu Baukau, atu buka tuir autor neebe harahun vidru janela Guest House iha rezidensia Madre Mazarelho Venilale foin lalais nee.
Insidente refere deskonfia involve husi ema deskonhesidu neebe tenta harahun vidru refere liu husi tuda dahuluk ho fatuk iha loron 01 Dezembru 2024 parte dader no kontinua tuda tan iha loron 02 Dezembru konsege harahun vidru husi janela kuartu 1.
Hafoin insidente nee akontese la rezulta ema ruma hetan kanek, tanba laiha ema deskansa iha fatin Guest House refere.
Maibe parte Autoridade Postu simu kedas informasaun husi madre sira iha fatin refere no kontaktu kedas ba parte seguransa Polisia Eskuadra Postu Venilale neebe dadaun hahu halo ona prosesu identifikasaun
Kuandu kazu ruma perturba ordem publiku nee papel seguransa nian, Autoridade Postu sempre kordena diak ho seguransa tuir papel lei neebe iha,” hatete Administrador Postu Venilale, Jose Freitas Boavida ba STL iha vila antiga, Baukau, Tersa (03/12/2024).
Autoridade Postu nee preokupasaun ho asaun ema deskonhesidu neebe harahun vidru refere, tanba la kontribui iha prosesu dezenvolvimentu.
Nia sublina, bainhira detekta autor refere sei kondena ho regra tara bandu neebe implementa ona ba Suku 8 hotu iha Postu Venilale no sei kontinua prosesu mos tuir dalan legal tuir lei perturba ordem publiku nian.
Hatan ba kestaun nee, Komadante Komando Polisia Munisipiu Baukau, Superintendente Xefe Polisia Antonio Maria De Sa sublina, relatoriu ofisial ba kazu refere parte Komando Munisipiu seidauk simu husi Eskuadra Venilale, tanba tuda husi ema deskonhesidu, maibe lansa ona informador sira sei iha prosesu buka tuir.
(EST 2)
