DILI, STLTIMORLESTE.com – Komando Polisia Nasional Timor Leste (PNTL) liu husi Diresaun Servisu Investigasaun Kriminal Nasional ho ekipa Investigasaun husi Komando Polisia Munisipiu Kovalima, hahu halao investigasaun ba sidadaun Indonezia ida neebe mate iha Fronteira Fatumea, Munisipiu Kovalima, iha loron Domingu liu ba.
Porta-voz Komando Polisia Nasional Timor Leste, superintendente Polisia, João Belo dos Reis hatete, Komando PNTL orienta ona Diresaun Servisu Investigasaun kriminal Nasional no ekipa Investigasaun husi Munisipiu hodi halo investigasaun ba sidadaun Indonezia ida neebe mate, iha fronteira fatumea, Munisipiu Kovalima.
“Ekipa Investigasaun kriminal Nasional no ekipa Investigasaun husi Munisipiu halao hela servisu hodi identifika fatin neebe potensia ba risku krimi. Neebe ita nia ekipa sira iha kraik halao hela servisu hodi identifika problema nee,” hatete Superintendente Polisia João liu husi konferensia imprensa neebe halao iha Edifisiu Ministeriu Interior, Dili, Kinta (21/08/2025).
Nia hatutan, Komando PNTL seidauk bele atualiza ba publiku kona ba sidadaun Indonezia nee mate kauza husi saida, tanba sei iha hela prosesu Investigasaun nia laran.
“Sidadaun Indonezia nee lao ho grupu kasador sira depois mate iha ita nia rai laran nee indisius neebe mak ita iha, depois identifikasaun tanba saida mak nia mate nee iha prosesu investigasaun sei lao hela,” dehan nia.
(alb)
