BAUKAU, STLTIMORLESTE.com – Komando Polisia Munisipiu Baukau identifika suspeitu nain 3 ba kazu deskonfia uza kilat manu tiru vitima 1 kanek iha Aldeia Maukale, Suku Gariuai, Postu Administrativu Baukau Vila, Munisipiu Baukau.
Komandante Komando Polisia Munisipiu Baukau, Superintendente Xefe Polisia Antonio Maria de Sa esplika, tuir keixa neebe Komando Polisia simu husi parte vitima nuudar mos membru Organizasaun CPD ho inisial OF, idade 28, hetan kanek iha Aldeia Maukale iha loron 03 Janeiru 2025 parte kalan, neebe deskonfia suspeitu nain 3 ho insial N, M no A utiliza arma hanesan kilat manu hodi tiru vitima kanek iha parte kabun, tanba kauza husi vitima no suspeitu sira antes nee iha ona problema.
“Kazu nee mosu polisia tun halo kedas atuasaun, medida nesesariu neebe polisia foti mak evakua kedas vitima ba hospital hodi submete ba tratamentu, no buka tuir autor ita kaer kedan iha momentu neeba, kaer autor nain 3 submete ba prosesu investigasaun iha Eskuadra Baukau Vila,” haktuir de Sa ba jornalista sira iha Vila Nova, Segunda (06/01/2025).
Komandante nee sublina, hafoin insidente nee akontese, parte Polisia hamutuk ho familia evakua vitima ba Hospital Rejional Eduardo Ximenes (HoREX) Baukau hodi hetan tratamentu, maibe liu husi teste diagnostiku neebe parte mediku sira halo la detekta bala musan iha parte vitima nia isin lolon, nunee parte mediku fo sai justifikasaun ba parte seguransa katak nee kanek normal, la kauza husi tiru.
Nunee parte mediku sira fo alta vitima hodi fila ba uma, maibe iha loron tuir mai 04 Janeiru parte familia kontinua lori hikas vitima ba HoREX no kontinua fali teste mediku, maibe nafatin deit laiha bala musan iha parte vitima nian isin lolon.
Enkuantu suspeitu nain 3 refere iha loron 04 Janeiru 2025 parte Komando Polisia Munisipiu Baukau, liu husi reuniaun Eskuadra Postu Baukau Vila kaptura iha rezidensia Maukale hodi submete ba prosesu investigasaun no daudaun aplika hela Termu Identidade Rezidensia (TIR) hodi hein prosesu kontinuasaun, tanba rejistu ona iha Ministeriu Publiku.
(EST 2)
