DILI, STLTIMORLESTE.com – Polísia Nasionál Timor Leste (PNTL) liu husi Diresaun Tranzitu Seguransa Rodoviária Nasional (DTSRN) rejeita sai sasin ba asidente neebe akontese iha area Fomentu Loja Funan Buaras nia oin, hodi halakon Zizelma Maria Fatima Verdial Gonçalves nia vida, tanba akontese nunee Polísia Tranzitu ba kedas iha fatin akontesimentu hodi sukat sena ba asidente nee no rekolha evidensia.
“Informasaun familia vitima neebe fo sai dehan, ami mak sasin nee la loos, tanba antes asidente fatal nee akontese laiha polísia ida mak hamriik hodi haree ho matan, maibe depois asidente nee mosu ami nia prezensa iha neeba atu halao ami nia servisu hanesan tranzitu seguransa rodaviaria nian hodi rekolha no sukat asidente fatal nee nia motivu,” hatete Diretor Diresaun Tranzitu Seguransa Rodoviária Nasional (DTSRN), Superintendente Assistente Polísia, Luis da Costa ba jornalista sira iha nia knaar fatin Komando Jeral PNTL, Kaikoli, Dili, Kuarta nee (02/04/2025).
Nia dehan, kazu asidente fatal neebe akontese iha area Fomentu Loja Funan Buras nia oin hodi halakon sidadaun Timoroan nia vida nee desizaun Tribunal, laos desizaun PNTL.
“Servisu PNTL liu husi Unidade Polísia Tranzitu neebe halao nia knaar tuir lei neebe prevee, tanba antes asidente fatal nee akontese hafoin polísia tranzitu ba kedas iha fatin akontesimentu hodi sukat sena ba asidente nee no ami rekolha evidensia neebe iha terenu hodi halo prosesu tuir lei,” dehan nia.
Nia tenik, informasaun neebe Komandante Tranzitu nee hetan husi Komandante Seksaun Tranzitu Munisípiu Díli, polísia konsege detein suspeitu iha oras 72 hafoin liberta fali.
“Tuir prosesu normal ami halao nee tuir regras neebe iha mak kodigu prosesu penal neebe fo kompetensia ba PNTL, maibe desizaun nee husi Tribunal no kompetensia husi Tribunal nian, maibe teknikamente dadus neebe Polísia hatoo ba Ministeriu Publiku (MP) ne’e signifika tuir duni asidente fatal neebe akontese,” nia esplika.
Nia hatutan, bainhira tribunal hasai desizaun, polísia labele too iha neeba, tanba nee mak polísia hatoo ba publiku katak, asidente fatal neebe akontese, Polísia Tranzitu Komando Munisípiu Díli halao nia prosesu normal bazeia ba regra.
“Ami husu ba familia vitima keta entende sala dehan polísia mak sai sasin nee lae, ami nia prezensa atu servisu tuir ami nian no ami laos sai sasin,” nia deklara.
Nia informa, Polisia Tranzitu nia prezensa iha asidente fatal nee atu rekolha dadus no mos ho evidensia sira nee atu lori ba Ministeriu Publiku, tanba sira mak nain ba kazu nee, polísia halao nia knaar servisu nuudar autoridade seguransa, laos sira nia prezensa atu sai sasin ba asidente nee.
“Autoridade Seguransa, ami halao ami nia servisu hodi asegura evidensia sira atu lori ba Ministeriu Publiku, bainhira Tribunal dehan, evidensia seidauk kompleta ami atu buka tuir maibe kazu nee nia nain mak Ministeriu Publiku no desizaun hotu-hotu iha Ministeriu Publiku laos polísia nia kompeténsia,” nia koalia.
Nia husu ba publiku desizaun iha Ministeriu Publiku nian laos iha polísia, polísia nuudar autoridade seguransa halao nia knaar no kompeténsia neebe iha tanba polísia labele halo servisu Ministeriu Publiku nian.
(jen)
