BAUKAU, STLTIMORLESTE.com – Deskonfia Polisia Eskuadra Postu Venilale tiru tohar joven ida nia ain parte loos, iha area Kaudadi, Suku Uma Ana Ulo, Postu Administrativu Venilale, Munisipiu Baukau.
Insidente nee akontese iha loron 02 Janeiru 2026, tuku 16:00 loraik, neebe rezultadu joven Amorin Multi Baptista Pinto, idade 23 hetan tohar iha parte ain loos.
Ba insidente nee, vitima Amorin Multi Baptista Pinto konta, iha loron 01 Janeiru 2026, Bairru Kaudadi realiza festa selebrasaun tinan foun nian too loron 02 Janeiru 2026 hamutuk ho maluk sira sobu tenda festa no halot sasan seluk tan too remata, nunee atu fila ba uma laiha intensaun atu buka problema, maibe too iha dalan iha konfrontu entre joven sira nomos prezensa membru Polisia husi Eskuadra Postu Venilale iha terenu halo atuasaun ba konfrontu refere liu husi tiru lakrimozeniu, rezulta Amorin hetan kanek iha parte ain loos, tanba hetan tiru husi membru Polisia husi Eskuadra Postu Venilale neebe halo atuasaun ba konfrontu refere.
“Problema nee kona-ba saida hau la hatene, hau nia intensaun nee atu ba loos uma, derepente Polisia tiru hau nia ain ho kilat hau monu,” Amorin konta ba STL iha sala emerjensia Hospital Rejional Eduardo Ximenes (HoREX) Baukau, Sabadu (03/01/2026)
Nia informa, hafoin hetan tiru husi membru Polisia husi Eskuadra Postu Venilale neebe atua konfrontu iha area Kaudadi, rezulta Amorin monu no desmaia, tanba raan fakar, maibe Polisia Eskuadra Postu Venilale evakua kedas nia husi fatin akontesimentu ba Sentru Saude Venilale atu fo asistensia mediku ba Amorin. Maibe la konsege kontinua halo tratamentu iha Sentru Saude Venilale, tanba liu husi Ambulansia tranporta Amorin ba iha Sala Emerjensia HoREX Baukau hodi hetan asistensia mediku ba ain neebe hetan tiru.
“Hau nia grave kedas tanba tohar tiha kedas, kona nee hau la hatene tuir aan ida, hau sai vitima ba kazu nee tenke ba oin,” Amorin katak.
Ba asaun nee, Amorin sei prosesu Polisia Eskuadra Postu Venilale, tanba la hatene motivu ba konfrontu, maibe hetan kanek.
Liga ba Amorin nia kanek, STL tenta konfirma ho mediku sira iha sala emerjensia HoREX Baukau, maibe lakohi fo komentariu. Nunee mos konfirma Komadante Komando Polisia Munisipiu Baukau, maibe laiha fatin atu fo komentariu, tanba iha hela Dili.
Jornalista: Tomas Reis
Editor: Xisto Mendonça
