BAUKAU, STLTIMORLESTE.com – Komando Polisia Munisipiu Vikeke kontinua buka tuir autor ba kazu soe bebe mane ida neebe akontese foin lalais nee iha Suku Karaubalu, Postu Administrativu Vikeke.
Kazu soe bebe nee akontese iha loron 15 Junhu, pur volta tuku 08:00 dader, iha ponte Vikeke Vila, hetan husi sidadaun joven feto inisial T.A idade 18, banheira T.A ba mota refere objetivu atu fase ropa, derepente hetan bebe nee no T.A hakfodak fila kedas ba uma hodi fo hatene ba nia inan aman too iha fatin haree bebe nee no halo kedas kontaktu Polisia hodi too kedas fatin evakua bebe refere ba Hospital Vikeke, maibe la konsege salva no Governu liu husi Ministeriu Solidariedade Sosial no Inkluzaun haloot ona iha semiteriu St Cruz Vikeke.
“Sei buka hela, depois mak ami informa fila fali,” hateten badak Komandante Komando Polisia Munisipiu Vikeke, Superintendente António Rego Fernandes ba STL liu husi telefone (17/06/2025).
Xefe Suku Karaubalu, João Salsinha Pinto husu Komando Polisia Munisipiu Vikeke orienta ekipa investigasaun ba rekolha CCTV iha loja Xineza neebe lokaliza besik ponte, neebe ema deskonhesidu soe bebe refere.
“Hau rekomenda hela ba sira rekolha CCTV sira antes ema balun ba foti ou delete,” João rekomenda.
Autoridade Suku nee mos husu ba Komando Polisia Vikeke atu halao servisu masimu buka tuir autor ba kazu refere, tanba kazu soe bebe iha Suku Karaubalu akontese ona dala rua ho bebe kondisaun diferente, dahuluk bebe feto kondisaun isin asu han hotu no daruak bebe mane kondisaun too iha hospital la konsege salva.
(tom)
