DILI, STLTIMORLESTE.com – Programa husi Sosiedade Sivil neebe luta ba direitu feto hamutuk ho Ministeriu Edukasaun, kona-ba politika fila hikas ba eskola nee diak ba feto.
Kestaun nee hatoo husi Feto Potensial, Maria Amaral ba STL iha nia knaar fatin, Kaikoli, Kinta (21/11/2024).
Nia hatete, politika nee diak maibe presiza mak aselera lalais, nunee bele fo biban ba iha feto neebe kaben sedu hakarak bele fila hikas ba eskola.
“Politika fila hikas ba eskola nee diak ba feto, no bele fo oportunidade ba feto sira hotu katak ida neebe mak durante nee para eskola tanba kaben sedu bele fila hikas ba eskola, maibe politika ida nee labele koalia deit tenke tau ba pratika no aselera lalais,” katak nia.
Maria hatutan, ida nee kompetensia husi Ministeriu Edukasaun oinsa mak bele aselera lalais, nunee labele hela ho promete maibe tenke iha asaun.
Nunee mos Diretora Ezekutivu Fokupers, Domingas Afonso Amaral husu ba Ministeriu Edukasaun atu aselera politika fila hikas eskola, tanba ate a data politika fila hikas ba eskola seidauk implementa no seidauk ratifika aprova husi Konselhu Ministru.
(eme)
